ରାୟଗଡା: ଦୃଢମନୋବଳ, ଅଦମ୍ୟ ସାହସ ଆଗରେ ଦିନେ ହାର ମାନିଥିଲା ଦିବ୍ୟାଙ୍ଗତା । ହେଲେ ଆଜି ଲକ୍ଡାଉନ୍ ସାମ୍ନାରେ ନିଜକୁ ଅସହାୟ ମଣିଛନ୍ତି ରାୟଗଡାର ଦିବ୍ୟାଙ୍ଗ ରିକ୍ସା ଚାଳକ ଏସ ସତ୍ୟମ ।
ଲକଡାଉନରେ ରିକ୍ସାରେ ପଡିଲା ଲକ୍, ଅସହାୟ ଦିବ୍ୟାଙ୍ଗ ରିକ୍ସା ଚାଳକ
ଗୋଟିଏ ହାତ ନଥିଲେ ବି ଦୀର୍ଘ 50 ବର୍ଷ ହେବ ରିକ୍ସା ଚାଳନାରେ ଦିନେ ରୋକ ଲଗାଇନଥିଲେ ସତ୍ୟମ । କିନ୍ତୁ ଏବେ ରିକ୍ସାରେ ଲକ୍ ପକାଇଦେଇଛି ଲକ୍ଡାଉନ୍ । ଫଳରେ ସାରା ଜୀବନ ସ୍ବାଭିମାନ ସହ ବଞ୍ଚିଥିବା 80 ବର୍ଷୀୟ ସତ୍ୟମଙ୍କର ନିଜ 5 ପ୍ରାଣୀ କୁଟୁମ୍ଭ ପୋଷିବା ଏବେ ଚିନ୍ତାର କାରଣ ପାଲଟିଛି ।
60 ବର୍ଷ ତଳେ ନିଜର ବାରାହା ଶିକାର ପାଇଁ ରଖାଯାଇଥିବା ବମ୍କୁ ଅଜାଣତରେ ହାତଦେଇ ନିଜର ଗୋଟିଏ ହାତ ହରାଇଥିବା ଏହି 80 ବର୍ଷୀୟ ଦିବ୍ୟାଙ୍ଗ ବୃଦ୍ଧ ରିକ୍ସା ଟାଣି ନିଜର ପରିବାର ପ୍ରତିପୋଷଣ କରନ୍ତି । ସକାଳୁ ସକାଳୁ ନିଜର ନିତ୍ୟ କର୍ମ ସାରି ରିକ୍ସାରେ ପାଲ ବାନ୍ଧି ରୋଜଗାର ଆଶାରେ ରିକ୍ସାକୁ ବସଷ୍ଟାଣ୍ଡ ଓ ରେଲୱେ ଷ୍ଟେସନକୁ ଛୁଟାଇଦିଅନ୍ତି । ସେଠାରୁ ଯାତ୍ରୀଙ୍କୁ ନେଇ ତାଙ୍କ ଗନ୍ତବ୍ୟ ସ୍ଥଳକୁ ଚାଲିଯାଆନ୍ତି ।