ରାୟଗଡା: ପଦ୍ମପୁର ବ୍ଲକ ନୂଆଗଡ ପଞ୍ଚାୟତ ପାଜିଲିବନ୍ଧ ଗ୍ରାମ ନୂଆସାହିରେ ବୃଦ୍ଧଙ୍କୁ ହତ୍ୟା ଘଟଣାରେ ଏକ ଭିନ୍ନ ରୂପ ଦେଖିବାକୁ ମିଳିଛି । ପୋଲିସ ଭୟରେ ଗାଁରୁ ସମସ୍ତ ପୁରୁଷ କେଉଁଆଡେ ଫେରାର୍ ହୋଇଯାଇଛନ୍ତି । ତଦନ୍ତ କରି ଖୁବଶୀଘ୍ର ଅଭିଯୁକ୍ତଙ୍କୁ ଗିରଫ କରାଯିବ ବୋଲି ପୋଲିସ କହିଛନ୍ତି । ତେବେ ଗୁଣିଗାରେଡି ସନ୍ଦେହରେ ଗ୍ରାମରେ ଘଟିଥିଲା ଏକ ନିର୍ମମ ହତ୍ୟାକାଣ୍ଡ ।
ସୂଚନା ଅନୁଯାୟୀ ଶୁକ୍ରବାର ରାତିରେ ରାୟଗଡା ଜିଲ୍ଲା ପଦ୍ମପୁର ବ୍ଲକର ନୂଆଗଡ ପଞ୍ଚାୟତ ପାଜିଲିବନ୍ଧ ଗ୍ରାମ ନୂଆସାହିର ୫୮ ବର୍ଷୀୟ ରାମ ମୂଲି ଘର ଶୋଇ ଥିବାବେଳେ ଗାଁର କିଛି ଲୋକ ସଂଘବଦ୍ଧ ହୋଇ ତାଙ୍କୁ ଡାକିଥିଲେ । ଘରୁ ରାମ ମୂଲିଙ୍କୁ ଡାକିନେଇ ଅତି ନିର୍ମମ ଭାବେ ହତ୍ୟା କରିଛନ୍ତି ଦୁର୍ବୃତ୍ତ । ଏନେଇ ଆଜି(ଶନିବାର) ଗୁଣୁପୁର ଏସଡିପିଓ ରାଜକିଶୋର ଦାସ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ଗୁଣିଗାରେଡି ସନ୍ଦେହରେ ରାମଙ୍କୁ ହତ୍ୟା କରାଯାଇଛି । ଗାଁ ଦାଣ୍ଡରେ ଠେଙ୍ଗାରେ ପ୍ରଥମେ ନିସ୍ତୁକ ମାଡମାରିବା ପରେ ଗାଁ ନିକଟସ୍ଥ ତୋଟାକୁ ନେଇ ଅତି ନିର୍ମମ ଭାବେ ହତ୍ୟା କରି ମୃତଦେହରେ ନିଆଁଲଗାଇ ଦେଇଥିଲେ । ପ୍ରମାଣ ନଷ୍ଟ କରିବା ଉଦ୍ଦେଶ୍ୟରେ ହାଡ ଓ ପାଉଁଶକୁ ନିକଟସ୍ଥ ନଦୀରେ ଭସାଇ ଦେଇଛନ୍ତି ।