ପୁରୀ:ନୂଆ ବର୍ଷରେ ନୂଆ ନିୟମ । ଏଣିକି ଶ୍ରୀମନ୍ଦିର ଭିତରକୁ ସ୍ମାର୍ଟଫୋନ ନେଇ ପାରିବେନି ସେବାୟତ ଓ ଶ୍ରୀମନ୍ଦିର କର୍ମଚାରୀ । ଏନେଇ ପୂର୍ବରୁ ନିଷ୍ପତ୍ତି ନିଆଯାଇଥିବା ବେଳେ ଆଜିଠାରୁ ଲାଗୁ ହେଲା ଏହି କଟକଣା । କଟକଣା ଲାଗୁ ହେବା ପରେ ଆଜି ଶ୍ରୀମନ୍ଦିରକୁ ପ୍ରଵେଶ ପୂର୍ବରୁ ସେବାୟତ ଓ ଶ୍ରୀ ମନ୍ଦିର କର୍ମଚାରୀ ମାନେ ସିଂହ ଦ୍ୱାର, ଦକ୍ଷିଣ ଦ୍ଵାର ଓ ପଶ୍ଚିମ ଦ୍ଵାରରେ ହୋଇଥିବା ସ୍ଵତନ୍ତ୍ର ମୋବାଇଲ୍ ଷ୍ଟାଣ୍ଡରେ ମୋବାଇଲ ରଖି ଭିତରକୁ ପ୍ରବେଶ କରୁଛନ୍ତି ।
ଶ୍ରୀମନ୍ଦିର ଭିତର ଫଟୋ ଓ ଭିଡ଼ିଓ ବାରମ୍ବାର ଭାଇରାଲ୍ ହେବା ଯୋଗୁ ଶ୍ରୀ ମନ୍ଦିର ସୁରକ୍ଷାକୁ ନେଇ ଉଠିଥିଲା ପ୍ରଶ୍ନ । ପରେ ବିଭିନ୍ନ ମହଲରେ ଦାବି ପରେ ଶ୍ରୀ ମନ୍ଦିର ପରିଚାଳନା କମିଟିରେ ମନ୍ଦିର ଭିତରକୁ ସ୍ମାର୍ଟ ଫୋନ୍ ପ୍ରବେଶ ନେଇ କଟକଣା ଲଗାଯାଇଛି । ତେବେ ଶ୍ରୀମନ୍ଦିର ମହାପ୍ରଭୁ ସେବା ପାଇଁ ପାଳି ଥିବା ସେବକ ମାନେ କ୍ୟାମେରା ନଥିବା କେବଳ କି ପ୍ୟାଡ ଫୋନ ନେଇ ଯାଇ ପାରିବେ ବୋଲି କୁହାଯାଇଛି ।
ନିକଟରେ ଶ୍ରୀମନ୍ଦିର ଗର୍ଭଗୃହ ଫଟୋ ଏବଂ ଡ୍ରୋନରେ ଉତ୍ତୋଳନ କରାଯାଇଥିବା ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏହାକୁ ନେଇ ଭକ୍ତ ଓ ସେବାୟତଙ୍କ ମହଲରେ ଉଦବେଗ ପ୍ରକାଶ ପାଇଥିଲା । ଗତ ୭ ତାରିଖରେ ବସିଥିବା ଛତିଶା ନିଯୋଗ ବୈଠକରେ ମନ୍ଦିର ମଧ୍ୟକୁ କେହି ଯେମିତି ସ୍ମାର୍ଟଫୋନ ନନିଅନ୍ତି ସେନେଇ ନିଷ୍ପତ୍ତି ନିଆଯାଇଥିଲା । ପରେ ଗତ ୧୫ ତାରିଖରେ ବସିଥିବା ପରିଚାଳନା କମିଟି ବୈଠକରେ ଏନେଇ ଆଲୋଚନା ହେବା ପରେ ଏପରି କଟକଣା ଲଗାଯିବା ନେଇ ନିଷ୍ପତ୍ତି ହୋଇଥିଲା । ତେବେ ସେବାୟତ ଓ କର୍ମଚାରୀଙ୍କ ସ୍ମାର୍ଟ ଫୋନ ରଖିବା ପାଇଁ ସିଂହଦ୍ବାର ଓ ଦକ୍ଷିଣ ଦ୍ବାରରେ ବ୍ୟବସ୍ଥା କରାଯାଇଛି । କେବଳ ସେବାୟତ ମାନେ କିପ୍ୟାଡ ଫୋନ ମନ୍ଦିରକୁ ନେଇ ଯାଇପାରିବେ ବୋଲି କୁହାଯାଇଛି । ଆଜିଠାରୁ ଏହି କଟକଣା କଡାକଡି ହୋଇଛି ।