ପୁରୀ: ଆସନ୍ତାକାଲି କାର୍ତ୍ତିକ ପୂର୍ଣ୍ଣିମା ହୋଇଥିବା ବେଳେ ପଡ଼ିଛି ଚନ୍ଦ୍ରଗ୍ରହଣ (Lunar eclipse on Kartika Purnima) । ଏଥିଲାଗି ଶ୍ରୀମନ୍ଦିରରେ ମହାପ୍ରଭୁଙ୍କର ଅନୁଷ୍ଠିତ ହେବ ସ୍ବତନ୍ତ୍ର ନୀତିକାନ୍ତି । କାଲି ପବିତ୍ର କାର୍ତ୍ତିକ ପୂର୍ଣ୍ଣିମା ଅବସରରେ ମହାପ୍ରଭୁଙ୍କ ରାଜରାଜେଶ୍ଵର (Raja rajeswar Form) ବା ସୁନାବେଶ ଅନୁଷ୍ଠିତ ହେବ । ସୋମବାର ରାତି ୧୨ଟାରୁ ଏହି ସ୍ବତନ୍ତ୍ର ନୀତିକାନ୍ତି ଆରମ୍ଭ ହେବ ବୋଲି ଶ୍ରୀମନ୍ଦିର ପ୍ରଶାସନ ପକ୍ଷରୁ ନୀତି ନିର୍ଘଣ୍ଟ କରାଯାଇଛି ।
ଆଜି ପଞ୍ଚୁକର ଚତୁର୍ଦ୍ଦଶୀ ତିଥିରେ ମହାପ୍ରଭୁଙ୍କ ଲକ୍ଷ୍ମୀନୃସିଂହ ବେଶ ଦେଖି ଭାବବିହ୍ବଳ ହୋଇଛନ୍ତି ଅଗଣିତ ଭକ୍ତ । ଆସନ୍ତାକାଲି ଗ୍ରହଣ ଲାଗୁଥିବାରୁ ସ୍ବତନ୍ତ୍ର ନୀତିକାନ୍ତି ଅନୁଷ୍ଠିତ ହେବ । ଶ୍ରୀମନ୍ଦିର ପ୍ରଶାସନ ପକ୍ଷରୁ ହୋଇଥିବା ନୀତି ନିର୍ଘଣ୍ଟ ଅନୁଯାୟୀ ଆଜି ରାତି ୧୨ଟା ୧୦ରେ ଶ୍ରୀମନ୍ଦିର ଦ୍ଵାର ଫିଟିବା ପରେ ମଙ୍ଗଳଆଳତୀ, ମଇଲମ, ଅବକାଶ ଆଦି ନୀତି ହୋଇ ରାତ୍ର ୨ଟା ୩୦ ସୁଦ୍ଧା ସୁନାବେଶ ସରିବ । ଆସନ୍ତାକାଲି ବର୍ଷର ଶେଷ ରାହୁଗ୍ରସ୍ତ ଖଣ୍ଡଗ୍ରାସ ଚନ୍ଦ୍ରଗ୍ରହଣ ହୋଇଥିବାରୁ ଏହି ସ୍ଵତନ୍ତ୍ର ରୀତିନୀତି ଅନୁଷ୍ଠିତ ହେବ । ସୂର୍ଯ୍ୟୋଦୟ ଅର୍ଥାତ୍ ଭୋର ୫ଟା ୫୪ ମିନିଟ ୫୩ ସେକେଣ୍ଡରୁ ପାକ ତ୍ୟାଗ ଓ ଦେବନୀତି ନିଷିଦ୍ଧ ହେବ । ଏଥିପାଇଁ ଶ୍ରୀମନ୍ଦିରରେ ୫ଟା ୪୦ ସୁଦ୍ଧା ଭୋଗମଣ୍ଡପ ସରିବ ।
ଏହା ମଧ୍ୟ ପଢନ୍ତୁ:ଶ୍ରୀମନ୍ଦିର ଛତିଶା ନିଯୋଗ ବୈଠକ, ଚନ୍ଦ୍ର ଗ୍ରହଣର ତୃଟିପର୍ଣ୍ଣ ନୀତି ହେଲା ପରିବର୍ତ୍ତନ
ଦିନ ୨ଟା ୩୮ ମିନିଟ ୧୪ ସେକେଣ୍ଡରେ ଗ୍ରହଣ ସ୍ପର୍ଶ ହେବା ମାତ୍ରେ ମହାପ୍ରଭୁଙ୍କ ସ୍ଵତନ୍ତ୍ର ନୀତିକାନ୍ତି କରାଯିବ । ତେବେ ଗ୍ରହଣ ନୀତିକୁ ଦେଖି ଭକ୍ତ ସୁନାବେଶ ଦେଖିପାରିବେ ନାଁ ନାହିଁ ତାହା ନିଷ୍ପତ୍ତି ନିଆଯିବ । ସନ୍ଧ୍ୟା ୬ଟା ୧୮ମିନିଟ ୪୭ ସେକେଣ୍ଡରେ ସର୍ବମୋକ୍ଷ ପରେ ପୁନଃ ଦେବନୀତି ଆରମ୍ଭ ହେବ । ତେବେ କାର୍ତ୍ତିକ ପୂର୍ଣ୍ଣିମା ଅର୍ଥାତ୍ ଆସନ୍ତାକାଲି ଗ୍ରହଣ ଲାଗୁଥିବାରୁ ଆଜି ରାତିରୁ ଆସନ୍ତା କାଲି ଭୋର ୫ଟା ୩୦ ପର୍ଯ୍ୟନ୍ତ ଭକ୍ତ ଶ୍ରଦ୍ଧାଳୁଙ୍କ ସହ ହବିଷ୍ୟାଳୀମାନେ ତୀର୍ଥରାଜ ମହୋଦଧି ସମେତ ପଞ୍ଚତୀର୍ଥ ପୁଷ୍କରିଣୀରେ ବୁଡ ପକାଇବା ସହ ଡଙ୍ଗା ଭସାଇପାରିବେ । ବୁଡ଼ ଓ ଡଙ୍ଗା ଭସାଇବା ପରେ ବ୍ରାହ୍ମଣକୁ ଛଞ୍ଚା ଦେଇ ହବିଷ୍ୟାଳୀ କାର୍ତ୍ତିକ ବ୍ରତ ଉଦଯାପନ କରିବେ ।