ପୁରୀ: ସୁରୁଖୁରୁରେ ଆଗେଇ ଚାଲିଛି ତିନି ରଥର ନିର୍ମାଣ କାର୍ଯ୍ୟ । ଶୁକ୍ରବାର ସନ୍ଧ୍ୟା ସୁଦ୍ଧା ତାଳଧ୍ବଜ ରଥର 11ଟି ଚକ ତିଆରି ଶେଷ ହୋଇଥିବା ସହ ଅନ୍ୟ ଦୁଇଟିର ତୁମ୍ଭରେ ଅର ସଂଯୋଗ ହୋଇ ପଇ ବିନ୍ଧ କାର୍ଯ୍ୟ ଚାଲିଛି । ସେହିପରି ଦେବଦଳନ ରଥର 9ଟି ଚକ କାର୍ଯ୍ୟ ଶେଷ ହୋଇଛି । ଅନ୍ୟ ଗୋଟିଏ ତୁମ୍ଭରେ ଅର ସଂଯୋଗ ଚାଲିଥିବା ବେଳେ ପଇ ବିନ୍ଧ କାର୍ଯ୍ୟ ଚାଲିଛି । ସମାନ ଭାବେ ନନ୍ଦିଘୋଷ ରଥର 11ଟି ଚକ କାର୍ଯ୍ୟ ଶେଷ ହୋଇଛି ।
ତିନି ରଥର ଗୟଳ ଚିରଟ କାର୍ଯ୍ୟ ଆରମ୍ଭ
ତାଳଧ୍ବଜ ରଥର ସମସ୍ତ 7 ଗୋଟି ଅଖ ଶେଷ ହୋଇ ମଠା କାର୍ଯ୍ୟ ଚାଲିଥିବା ବେଳେ ଦେବଦଳନ ରଥର ସମସ୍ତ 6 ଗୋଟି ଅଖ ଶେଷ ହୋଇଛି । ଅନ୍ୟପଟେ ନନ୍ଦିଘୋଷ ରଥର 6ଟି ଅଖ ଶେଷ ହୋଇ 2ଟି ଅଖର କାର୍ଯ୍ୟ ଚାଲିଛି । ସେହିପରି 3 ରଥର ଚାରି ନାହାକା କାର୍ଯ୍ୟ ଶେଷ ପର୍ଯ୍ୟାୟରେ ଥିବା ସହ 3 ରଥର 2ଟି ଲେଖାଏଁ ଗରଗରା କାର୍ଯ୍ୟ ଚାଲିଛି । ଦୋଳ ବେଦୀ କୋଣରେ କରତି ସେବକଙ୍କ ଦ୍ଵାରା ଗୟଳ ଚିରଟ କାର୍ଯ୍ୟ ଚାଲିଛି ।