ଡକାୟତି ଯୋଜନା କରୁଥିବା ବେଳେ 5 ଡକାୟତ ଗିରଫ

ଡକାୟତି ଯୋଜନା କରୁଥିବା ବେଳେ 5 ଡକାୟତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ । ଅଧିକ ପଢନ୍ତୁ...

ପୁରୀ: ବଡ ଡକାୟତି ଯୋଜନା ପଣ୍ଡ କଲା ପୋଲିସ । ପୁରୀରେ ଲଗାତାର ଅପରାଧିକ କାର୍ଯ୍ୟକଳାପ ବୃଦ୍ଧି ପାଉଥିବା ବେଳେ ସମୁଦ୍ର କୂଳ ଥାନା ପୋଲିସ ଗୁରୁବାର ବିଳମ୍ବିତ ରାତିରେ ଡକାୟତି ଯୋଜନା କରିଥିବା ସମୟରେ 5 ଜଣ ଦୁର୍ବୃତ୍ତଙ୍କୁ ଗିରଫ କରିଛି । ସେମାନଙ୍କ ନିକଟରୁ ଗୋଟିଏ ଖଣ୍ଡା, ପିସ୍ତଲ, ଚାପଡ ଓ ଏକ ଲୁହା ପାଇପ ଜବତ କରାଯାଇଛି । ଅଭିଯୁକ୍ତମାନେ ହେଲେ ମାର୍କଣ୍ଡେଶ୍ବର ଗୋଖା ସାହିର ଅର୍ଜୁନ ମହାନ୍ତି, ମାଟିତୋଟା ସୁଜାତା ଲେନର ଜଗନ୍ନାଥ ସ୍ବାଇଁ, ନରେନ୍ଦ୍ର କୋଣ ମଙ୍ଗଳାସାହିର ବିକାଶ ବେହେରା, ବ୍ଲକ ଛକ ଲେଙ୍କା ସାହିର ରୁଦ୍ର ନାରାୟଣ ସେଠୀ ଏବଂ ଶ୍ରୀକ୍ଷେତ୍ର କଲୋନୀର ମାନସ ବାରିକ । ଏନେଇ ଏକ ମାମଲା ରୁଜୁ କରାଯାଇ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଥିବା ନେଇ ପୋଲିସ ସୂଚନା ଦେଇଛି ।

ସୂଚନା ମୁତାବକ, ଗତକାଲି(ଗୁରୁବାର) ବିଳମ୍ବିତ ରାତିରେ ପେଣ୍ଠକଟା ଫାଣ୍ଡି ଅଧିକାରୀ ଏଏସଆଇ ବିଦ୍ୟାଧର ଭୋଳ ପାଟ୍ରୋଲିଂ କରୁଥିଲେ । ଏହି ସମୟରେ କିଛି ଦୁର୍ବୃତ୍ତ ସଂସ୍କୃତ ବିଶ୍ବ ବିଦ୍ୟାଳୟ ପରିସରରେ ଥିବା ଗଙ୍ଗାଦେବୀ ମନ୍ଦିର ପାଖରେ ବସି ଡକାୟତି ଯୋଜନା କରୁଥିଲେ । ଏନେଇ ପୋଲିସ ପାଖରେ ଖବର ପହଞ୍ଚିଥିଲା । ପରେ ପୋଲିସ ଘଟଣାସ୍ଥଳରେ ଚଢାଉ କରି ସମସ୍ତ ଡକାୟତିଙ୍କୁ ଧରିବାରେ ସଫଳ ହୋଇଛି । ତେବେ ଏହି ଚଢାଉ ବେଳେ ଅଭିଯୁକ୍ତମାନେ ପୋଲିସ ଉପରେ ବୋମାମାଡ କରି ଖସି ଯିବାକୁ ଉଦ୍ୟମ କରିଥିଲେ ହେଁ ସେମାନଙ୍କୁ କାବୁ କରାଯାଇଛି ।

ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ