ପୁରୀ: ନାବାଳକ ଶିଶୁ ରୋଗୀଙ୍କ ଉପରକୁ ହାତ ଉଠାଇଲେ ଡାକ୍ତର । ଅସ୍ତ୍ରୋପଚାର ସମୟରେ କାନ୍ଦିବାରୁ ନିରୀହ ଶିଶୁକୁ ସେ ମାରିଥିବା ଅଭିଯୋଗ ହୋଇଛି । ତେବେ ଡାକ୍ତରଙ୍କ ମାଡରେ ଶିଶୁଟିର ମୁହଁରେ ଆଘାତ ଲାଗି ଶିଶୁଟି ଅସୁସ୍ଥ ହୋଇପଡିଥିବା ଜଣାପଡିଛି । ସେପଟେ ଏହି ଘଟଣା ପରେ ମେଡିକାଲରେ ଉତ୍ତେଜନା ପ୍ରକାଶ ପାଇଛି । ଏଭଳି ଏକ ଅପ୍ରିତିକର ଘଟଣା ଦେଖିବାକୁ ମିଳିଛି ପୁରୀ ସଦର ମୁଖ୍ୟ ଚିକିତ୍ସାଳୟରେ ।
ଭିଡିଓ ସୌଜନ୍ୟ: ସମ୍ବାଦଦାତା, ପୁରୀ
ସୂଚନା ମୁତାବକ, ପୁରୀ ମିଶ୍ର ସାହି ନିବାସୀ ବିନୋଦିନୀ ମହାନ୍ତି ନିଜ ୧୦ବର୍ଷର ନାତିକୁ ଧରି ଛୋଟ ଅପରେସନ ପାଇଁ ପୁରୀ ମେଡିକାଲ ଆସିଥିଲେ । ପୂର୍ବ ପ୍ରସ୍ତୁତି ଅନୁଯାୟୀ ଶିଶୁଟିକୁ ଅସ୍ତ୍ରୋପଚାର ରୁମକୁ ଅଣାଯାଇଥିଲା। ତେବେ ଇଞ୍ଜେକ୍ସନ ଯୋଗୁଁ ଶିଶୁଟି କାନ୍ଦିବାରୁ ପି.କେ.ଜେନା ନାମକ ଜନୈକ ସର୍ଜରୀ ଡାକ୍ତର ତାକୁ ମାରିଥିଲେ। ଫଳରେ ତା ଗାଲରେ ଗଭୀର କ୍ଷତ ହେବା ସହ ଫୁଲିଯାଇଥିଲା । ଏହା ବ୍ୟତିତ ଉକ୍ତ ଡାକ୍ତରଖାନାରେ ଅସ୍ତ୍ରୋପଚାର ପାଇଁ ୭୦୦ ଟଙ୍କା ଲାଞ୍ଚ ମଧ୍ୟ ନେଇଥିବା ପରିବାର ପକ୍ଷରୁ ଅଭିଯୋଗ ହୋଇଛି ।