ପୁରୀରେ ପାଣ୍ଡିଆନଙ୍କୁ ବିରୋଧ, କଳା ପତାକା ଦେଖାଇଲେ କଂଗ୍ରେସ କର୍ମୀ

VK Pandian opposed in Puri: ଥମୁନି କାମିଆ ଜାନି ବିବାଦ । ଏହି ଘଟଣାକୁ ନେଇ ପୁରୀରେ ଭିକେ ପାଣ୍ଡିଆନଙ୍କୁ କଳା ପତକା ଦେଖାଇଲେ କଂଗ୍ରେସ କର୍ମୀ । ଅଧିକ ପଢନ୍ତୁ

ପୁରୀ: ପୁରୀରେ 5T ଅଧ୍ୟକ୍ଷ ଭିକେ ପାଣ୍ଡିଆନକୁ ବିରୋଧ । କଳା ପତାକା ଦେଖାଇ ବିରୋଧ ପ୍ରଦର୍ଶନ କଲେ କଂଗ୍ରେସ କର୍ମୀ । ୟୁଟ୍ୟୁବର କାମିଆ ଜାନିଙ୍କୁ ଶ୍ରୀମନ୍ଦିର ପ୍ରବେଶ କରାଇବାକୁ ନେଇ ପାଣ୍ଡିଆନଙ୍କୁ କଳା ପତାକା ଦେଖାଇ ପ୍ରତିବାଦ କରିଛି କଂଗ୍ରେସ । କାମିଆ ଜାନିଙ୍କୁ ଶ୍ରୀମନ୍ଦିରରେ ପ୍ରବେଶ କରାଇ ପାଣ୍ଡିଆନ ସନାତନ ବିରୋଧୀ କାମ କରିଛନ୍ତି ବୋଲି କଂଗ୍ରେସ କର୍ମୀ କହିଛନ୍ତି । ତେବେ କଳା ପତାକା ପ୍ରଦର୍ଶନ ପରେ କଂଗ୍ରେସ କର୍ମୀମାନଙ୍କୁ ଅଟକ ରଖାଯାଇଛି ।

ପ୍ରତ୍ୟେକ ଶନିବାର ଭିକେ ପାଣ୍ଡିଆନ ଶ୍ରୀମନ୍ଦିର ପରିକ୍ରମା ପ୍ରକଳ୍ପ କାର୍ଯ୍ୟର ଅଗ୍ରଗତି ଅନୁଧ୍ୟାନ ପାଇଁ ପୁରୀ ଗସ୍ତ କରନ୍ତି । ଆଜି ମଧ୍ୟ ଭୋର ସମୟରେ ସେ ପୁରୀ ଯାଇଥିବା ବେଳେ ଜିଲ୍ଲା କଂଗ୍ରେସ ପକ୍ଷରୁ କଳା ପତକା ପ୍ରଦର୍ଶନ କରାଯାଇଥିଲା । ପାଣ୍ଡିଆନଙ୍କୁ ବିରୋଧ କରି ଗୋ ବ୍ୟାକର ନାରା ଦେଇଥିଲେ କର୍ମୀ । ଏହାପରେ ପୋଲିସ ବିକ୍ଷୋଭକାରୀଙ୍କୁ ଉଠାଇ ନେଇଥିବା ଜଣାପଡିଛି । କାମିଆ ଜାନି ଗୋମାଂସ ଭକ୍ଷଣ କରୁଥିବା ଅଭିଯୋଗ ହେଉଥିବା ବେଳେ ତାଙ୍କୁ ଶ୍ରୀମନ୍ଦିର ଭିତରେ ପ୍ରବେଶ କରାଇ ପାଣ୍ଡିଆନ ସନାତନ ବିରୋଧୀ କାମ କରିଛନ୍ତି ବୋଲି କଂଗ୍ରେସ କହିଛି ।

କାମିଆ ଜାନି ଶ୍ରୀମନ୍ଦିରରେ ପ୍ରବେଶ କରିବା ସହ ମହାପ୍ରସାଦ ସେବନ କରିବା ସମୟର ଏକ ଭିଡିଓ ୟୁଟ୍ୟୁବରେ ଅପଲୋଡ କରିଥିଲେ । ଏନେଇ ରାଜ୍ୟରେ ବିବାଦ ଥମିବାର ନାଁ ଧରୁନି । ଏହାକୁ ନେଇ ବିରୋଧୀ ସରକାରଙ୍କୁ ଘେରିଥିବା ବେଳେ ବିଭିନ୍ନ ସଂଗଠନ ପକ୍ଷରୁ ମଧ୍ୟ ପ୍ରତିବାଦ କରାଯାଉଛି । ନିକଟରେ ବିଶ୍ବ ହିନ୍ଦୁ ପରିଷଦ ମଧ୍ୟ ଉଭୟ ୟୁଟ୍ୟୁବର ଏବଂ 5T ଅଧ୍ୟକ୍ଷ ଭିକେ ପାଣ୍ଡିଆନଙ୍କୁ ସମାଲୋଚନା କରିଥିଲେ । ଜଗନ୍ନାଥ ସଂସ୍କୃତି ପ୍ରଚାର ପ୍ରସାର କରିବା ଆଳରେ ମହାପ୍ରଭୁଙ୍କୁ ଅପମାନ କରାଯାଇଛି । ପାଣ୍ଡିଆନ ଜଣେ ଗୋମାଂସ ଭକ୍ଷଣକାରୀଙ୍କୁ ଶ୍ରୀମନ୍ଦିରରେ ପ୍ରବେଶ କରାଇ ଜଗନ୍ନାଥ ସଂସ୍କୃତି ପରମ୍ପରା ଉଲ୍ଲଙ୍ଘନ କରିଛନ୍ତି ବୋଲି ବିଶ୍ବ ହିନ୍ଦୁ ପରିଷଦ କହିଥିଲା ।

ଏନେଇ ଜଣେ କଂଗ୍ରେସ କର୍ମୀ କହିଛନ୍ତି ଯେ, ପାଣ୍ଡିଆନଙ୍କୁ କଳା ପତାକା ଦେଖାଇବାରୁ ଜିଲ୍ଲା କଂଗ୍ରେସର କର୍ମକର୍ତ୍ତାକୁ ପୋଲିସ ଅଟକ ରଖିଛି । ଜିଲ୍ଲା ପ୍ରଶାସନ ପାଣ୍ଡିଆନ ଓ କାମିଆଙ୍କୁ ବଞ୍ଚାଇବାକୁ ଚାଟୁକାରିତା କରୁଛନ୍ତି । ଏହା ବିରୋଧ କରି ଆଜି ଜିଲ୍ଲା କଂଗ୍ରେସ ପକ୍ଷରୁ ବିରୋଧ ପ୍ରଦର୍ଶନ କରାଯାଇଥିଲା ।

ଇଟିଭି ଭାରତ, ପୁରୀ