ଜଙ୍ଗଲରୁ ଝୁଲନ୍ତା ଅବସ୍ଥାରେ ନରକଙ୍କାଳ ଉଦ୍ଧାର, ଘଟଣାସ୍ଥଳରୁ ଚପଲ-ପୋଷାକ ଜବତ

ନୂଆପଡା ଜିଲ୍ଲା ଢେଙ୍କିକୁଟ ଜଙ୍ଗଲରୁ ଗଳିତ ନରକଙ୍କାଳ ଉଦ୍ଧାର । ଜବତ ନର କଙ୍କାଳ ସ୍ଥାନୀୟ ଅଞ୍ଚଳର ହୋଇନଥିବାବେଳେ ଏହା ହତ୍ୟା ନା ଆତ୍ମହତ୍ୟା ସେ ନେଇ କାରଣ ଖୋଜୁଛି ପୋଲିସ ।

ନୂଆପଡା: ଖଡିଆଳ ଥାନା ଲାଞ୍ଜି ଗ୍ରାମ ଢେଙ୍କିକୁଟ ଜଙ୍ଗଲରୁ ଗଳିତ ନର କଙ୍କାଳ ଉଦ୍ଧାର ହୋଇଛି । ଜବତ ନର କଙ୍କାଳର ପରିଚୟ ଜଣାପଡିନଥିବାବେଳେ ଘଟଣାର ତଦନ୍ତ କରୁଛି ପୋଲିସ ।

ସୂଚନାନୁଯାୟୀ, ଲାଞ୍ଜିଗଡ ଗ୍ରାମ ନିକଟସ୍ଥ ଢେଙ୍କିକୁଟ ଜଙ୍ଗଲକୁ ସ୍ଥାନୀୟ ଲୋକ ଜାଳେଣୀ କାଠ ପାଇଁ ଯାଇଥିଲେ । ଏହି ସମୟରେ ଜଙ୍ଗଲରେ ଥିବା ଗୋଟିଏ ଗଛରେ ଏକ ନର କଙ୍କାଳ ଝୁଲୁଥିବା ଦେଖିବାକୁ ପାଇଥିଲେ । ଗାଁ ଲୋକେ ତୁରନ୍ତ ଏସମ୍ପର୍କରେ ଖଡିଆଳ ପୋଲିକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି ।

ତେବେ ଗଛରେ ଝୁଲୁଥିବା କଙ୍କାଳ ମୁଣ୍ଡ ଛିଣ୍ଡି ତଳେ ପଡିଥିବାବେଳେ ଉକ୍ତ ସ୍ଥାନ ନିକଟରୁ ଚପଲ, ପୋଷାକ ଏବଂ ଗଣ୍ଡି ମୁଣ୍ଡ ଜବତ କରିଛି ପୋଲିସ । ମୃତକ ସ୍ଥାନୀୟ ଅଞ୍ଚଳର ହୋଇନଥିବାବେଳେ ଘଟଣାଟି ହତ୍ୟା ନା ଆତ୍ମହତ୍ୟା ତାହା ଜଣାପଡିନାହିଁ ।

ନୂଆପଡାରୁ ମୋତିଲାଲ ବାଗ, ଇଟିଭି ଭାରତ