ନୂଆପଡା: ପୁଣି କାନ୍ଧ ସାହାଯ୍ୟରେ ଷ୍ଟ୍ରେଚରରେ ବୁହା ହେଲେ ଗର୍ଭବତୀ ମହିଳା । ନୂଆପଡା ଜିଲ୍ଲା ସିନାପାଲି ବ୍ଲକ ମାଓ ଅଧ୍ୟୁଷିତ ବିଛିନ୍ନାଞ୍ଚଳ ଚିତାରମା ଗାଁରେ ଏଭଳି ଦୃଶ୍ୟ ଦେଖିବାକୁ ମିଳିଛି । ଆଲୁଅ ଲିଭି ଆସୁଥିଲା ଆଉ ମାଡି ଆସୁଥିଲା ଅନ୍ଧକାର । ସେପଟେ ଝିପିଝିପି ବର୍ଷା । ଘଞ୍ଚ ଜଙ୍ଗଲ ଭିତରେ ଥିବା ଚିତାରମା ଗାଁରେ ସନ୍ଧ୍ୟା 6 ଟାରେ ଦେଖିବାକୁ ମିଳିଥିଲା ଏପରି କିଛି ଦୃଶ୍ୟ ।
ଦୀର୍ଘ ସମୟ ଗର୍ଭ ଯନ୍ତ୍ରଣା ପାଇବାପରେ ଗାଁର ସାହସିକ ଯୁବକ ଓ ସମ୍ପର୍କୀୟ ମାନେ ଏକତ୍ରିତ ହୋଇ ଉଦନ୍ତୀ ନଦୀର 6 ଫୁଟ ପାଣିରେ ବିପଦସଙ୍କୁଳ ଅବସ୍ଥାରେ ଷ୍ଟ୍ରେଚରରେ ବୋହି ନଦୀ ପାର କରି ଦମନ ସ୍ବାସ୍ଥ୍ୟ ଶିବିର ସିନ୍ଦୁରସିଲରେ ପହଞ୍ଚିଥିଲେ । ପରେ ସିନାପାଲି ମାଆ ଗୃହକୁ ନେଇ ଆସିଥିଲେ । ସରକାର ବିଛିନ୍ନାଞ୍ଚଳ ଇଲାକାକୁ ମୁଖ୍ୟସ୍ରୋତରେ ସାମିଲ କରୁଥିବା ଡିଣ୍ଡିମ ପିଟୁଥିବା ବେଳେ ନୂଆପଡା ଜିଲ୍ଳାରେ ତାର ନଗ୍ନ ଚିତ୍ର ଦେଖାଦେଇଛି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ