କଂଗ୍ରେସ ନେତାଙ୍କ ଘରୁ ନାବାଳିକାର ମୃତଦେହ ଉଦ୍ଧାର!

ଖଡିଆଳରେ କଂଗ୍ରେସ ନେତାଙ୍କ ଭଡା ଘରେ ଜଣେ ନାବାଳିକାଙ୍କ ସନ୍ଦେହନଜକ ମୃତ୍ୟୁ ହୋଇଛି । ବେକରେ ଓଢଣୀ ଲଗାଇ ଝୁଲନ୍ତା ଅବସ୍ଥାରେ ଉଦ୍ଧାର କରାଯାଇଥିବା ବେଳେ ପୋଲିସ ଏ ଘଟଣାର ଖୋଳତାଡ ଆରମ୍ଭ କରିଛି ।

ନୂଆପଡ଼ା: ଖଡ଼ିଆଳର ବରିଷ୍ଠ କଂଗ୍ରେସ ନେତା ସୁଧିର ପଟ୍ଟନାୟକଙ୍କ ଘରେ ନାବାଳିକାଙ୍କ ସନ୍ଦେହ ଜନକ ମୃତ୍ୟୁ । ତାଙ୍କ ପଛପଟ ଘରୁ ମୃତକ ନାବାଳିକାର ମୃତଦେହ ଉଦ୍ଧାର ହୋଇଛି । ନିଜ ପରିବାର ଲୋକଙ୍କ ସହ ସେହି ଘରେ ଭଡାରେ ରହୁଥିଲେ ନାବାଳିକା । ତେବେ ଏହା ଆତ୍ମହତ୍ୟା ନା ହତ୍ୟା ସ୍ପଷ୍ଟ ହୋଇନଥିବା ବେଳେ, ପୋଲିସ ଏ ଘଟଣାର ତଦନ୍ତ ଆରମ୍ଭ କରିଛି ।

ସୂଚନାଯୋଗ୍ୟ, କଂଗ୍ରେସ ନେତା ସୁଧିରଙ୍କ ଘର ପଛ ପଟେ ମନୀଷା(16) ଓ କୁନି ଶବର(14) ତାଙ୍କ ଜେଜେମା'ଙ୍କ ସହିତ ଭଡାରେ ରହୁଥିଲେ । ଜେଜେମା' ନେତାଙ୍କ ଘରେ କାମ କରୁଥିବାବେଳେ ନିକଟସ୍ଥ ସ୍କୁଲରେ ପାଠ ପଢୁଥିଲେ ଦୁଇ ନାତୁଣୀ । ମୃତ ନାବାଳିକାଙ୍କ ବାପା ଏବଂ ମାଆ ଉଭୟେ ହାଇଦ୍ରାବାଦରେ ଦାଦନ ଖଟିବାକୁ ଯାଇଛନ୍ତି ।

ତେବେ ଘଟଣା ଦିନ, ବଡ ଭଉଣୀ ମନୀଷା ଶବର କୌଣସି କାମରେ ବାହାରକୁ ଯାଇ ଘରକୁ ଫେରିବା ବେଳେ ସାନ ଭଉଣୀକୁ ଝଲନ୍ତା ଅବସ୍ଥାରେ ଦେଖିବାକୁ ପାଇଥିଲେ । ଏହା ପରେ ସେ ଜେଜେମାଆକୁ ଡାକିବା ପରେ ଏ ଘଟଣାଟି ପ୍ରଘଟ ହୋଇଥିଲା ।

ସେପଟେ, ଖବର ପାଇ ଘଟଣାସ୍ଥଳରେ ଖଡିଆଳ ପୋଲିସ ପହଞ୍ଚି ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ନେଉଥିବା ସମୟରେ ଆମ୍ବୁଲାନ୍ସର ଷ୍ଟ୍ରେଚର ନଥିଲା । ହେଲେ ଏହା ହତ୍ୟା ନା ଆତ୍ମହତ୍ୟା ସନ୍ଦେହ ଘେରରେ ରହିଥିବା ବେଳେ ମୃତ ନାବାଳିକାର ଭିଣୋଇ ଭୁବନ ଶବର ପୋଲିସ ନିକଟରେ ଏନେଇ ଏକ ଅଭିଯୋଗ କରିଛନ୍ତି ।

ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ