ନୂଆପଡା: ମଦ କେତେ ପରିବାର ଉଜାଡିଛି କେତେ ସମ୍ପର୍କ ଭାଙ୍ଗିଛି । ମଦ ଅନେକଙ୍କ ଜୀବନ ବର୍ବାଦ କରିଛି । ଦିନକୁ ବେଆଇନ ମଦ କାରବାର ବଢିବାରେ ଲାଗିଛି । ନୂଆପଡା ଜିଲ୍ଲା ଖଡ଼ିଆଳ ଥାନା ଘରଧରା ଗ୍ରାମରେ ବେଆଇନ ମଦ କାରବାର ଦ୍ରୁତ ଗତିରେ ବଢ଼ିବାରେ ଲାଗିଛି । ଏହାକୁ ବିରୋଧ କରିଛନ୍ତି ଗାଁର ମହିଳା । ଗାଁକୁ ବେଆଇନ ମଦମୁକ୍ତ କରିବାପାଇଁ ମହିଳାମାନେ ହାତରେ ଠେଙ୍ଗା ଧରି ଗାଁ ପରିକ୍ରମା କରି ନିକଟସ୍ଥ କୁଲିଗାଁ ଦେଶୀ ମଦଭାଟିକୁ ଘେରାଉକରି ମଦ ବନ୍ଦ କରିବାପାଇଁ ଚେତାବନୀ ଦେଇଛନ୍ତି ।
ଗାଁରେ ରାତି ପାହିଲେ ନିଶାସକ୍ତ ବ୍ୟକ୍ତିଙ୍କ ପ୍ରାଦୁର୍ଭାବ ଦେଖିବାକୁ ମିଳୁଛି । ମଦ୍ୟପ ବ୍ୟକ୍ତିଙ୍କ ଅତ୍ୟାଚାରରେ ଗାଁଦାଣ୍ଡରେ ମହିଳାମାନେ ଅସୁରକ୍ଷିତ ମଣୁଛନ୍ତି । ଘରଧରା ଛୋଟ ଗାଁ ହୋଇଥିଲେ ବି ଏଠାରେ 7ଟି ବେଆଇନ ମଦକୋଠି ରହିଛି । ଫଳରେ ଘରଧରା ଗାଁ ଅସୁରକ୍ଷିତ ହୋଇପଡିଛି । ଦୈନିକ କିଛି ଲୋକ ମଦ ପିଇ ନିଶାସକ୍ତ ଅବସ୍ଥାରେ ଗାଁଦାଣ୍ଡରେ ବୁଲି ଅସ୍ବାସ୍ଥ୍ୟକର ପରିବେଶ ସୃଷ୍ଟି କରୁଛନ୍ତି । ସ୍ତ୍ରୀ ପିଲା ଛୁଆଙ୍କୁ ମାଡମାରି ଘର ରଖିଥିବା ଟଙ୍କା ସୁନା ଗହଣା ଛଡ଼ାଇନେଇ ମଦ ପିଉଛନ୍ତି । ଘରକୁ ସର୍ବସାନ୍ତ କରିଚାଲିଛି ମଦ। ଏମାନଙ୍କୁ ସାବାଡ଼ କରି ଗାଁକୁ ମଦମୁକ୍ତ କରିବାପାଇଁ ଘରଧରା ଗ୍ରାମର ଶତାଧିକ ମହିଳା ହାତରେ ଠେଙ୍ଗା ଧରି ମଦମୁକ୍ତି ସ୍ଲୋଗାନ ଦେଇଛନ୍ତି ।