ଶ୍ରଦ୍ଧାଳୁଙ୍କ ଗହଣରେ ସୁନାଦେଇଙ୍କ ଛତର ଯାତ୍ରା ସମ୍ପନ୍ନ, ରକ୍ତ ରଞ୍ଜିତ ହେଲା ମାଆଙ୍କ ପୀଠ

ନୂଆପଡା ଜିଲ୍ଲାରେ ମାଆ ସୁନାଦେଇଙ୍କ ଛତର ଯାତ୍ରା ଅନୁଷ୍ଠିତ । ଲକ୍ଷ ଲକ୍ଷ ଭକ୍ତଙ୍କ ଗହଣରେ ହେଲା ଯାତ୍ରା । ଅଧିକ ପଢନ୍ତୁ

ନୂଆପଡା:ନୂଆପଡ଼ା ଜିଲ୍ଲାର ଲାଲଗଡ଼ କୁହାଯାଉଥିବା ସୁନାବେଡ଼ା ଅଭୟାରଣ୍ୟରେ ବହୁ ପ୍ରସିଦ୍ଧ ଚକୋଟିଆ ଭୁଞ୍ଜିଆ ସମ୍ପ୍ରଦାୟର ଅଧିଷ୍ଠାତ୍ରୀ ଦେବୀ ମାଆ ସୁନାଦେଇଙ୍କ ଛତର ଯାତ୍ରା ହର୍ଷ ଉଲ୍ଲାସରେ ପାଳିତ ହୋଇଯାଇଛି । ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଗହଣରେ ମାଆ ସୁନାଦେଇ କାଳିଶିି ଦେହରେ ଆବିର୍ଭାବ ହୋଇ ଆଦିମ ଜନଜାତି ଅଞ୍ଚଳ ଭ୍ରମଣ କରିଛନ୍ତି । ଶ୍ରଦ୍ଧାଳୁଙ୍କ ବୋଦା ବଳୀରେ ରକ୍ତ ରଞ୍ଜିତ ହୋଇଯାଇଥିଲା ମାଆଙ୍କ ପୀଠ ।

ନୂଆପଡ଼ା ଜିଲ୍ଲା ସୁନାବେଡ଼ା ଅଭୟାରଣ୍ୟରେ ସୁରକ୍ଷାକର୍ମୀଙ୍କ କଡ଼ା ସୁରକ୍ଷା ବଳୟରେ ଚକୋଟିଆ ଭୁଞ୍ଜିଆଙ୍କ ଦେବୀ ମାଆ ସୁନାଦେଇଙ୍କ ଛତର ଯାତ୍ରା ସମ୍ପନ୍ନ ହୋଇଯାଇଛି । ତେବେ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ଉପସ୍ଥିତିରେ ଏହି ଯାତ୍ରା ସୁଚାରୁରୂପେ ଶେଷ ହୋଇଛି ।ମାନସିକ ପୂରଣଧାରୀ ଶ୍ରଦ୍ଧାଳୁ ମାନେ ଶହ ଶହ ସଂଖ୍ୟାରେ ମାଆଙ୍କୁ ମନ୍ଦାର ମାଳ, ବୋଦା ବଳୀ ଦେଇ ସନ୍ତୁଷ୍ଟ କରିଛନ୍ତି । ରକ୍ତ ରଞ୍ଜିତ ହୋଇ ପଡିଛି ମାଆଙ୍କ ପୀଠ ।

ତେବେ ବିଶ୍ବାସ ଅନୁଯାୟୀ, ମାଆଙ୍କୁ ଭକ୍ତିର ସହ ଡାକିଲେ ସବୁ ମନୋସ୍କାମନା ପୂରଣ ହୋଇଥାଏ । ଓ ମାନସିକ ପୂରଣ ପରେ ମାଆଙ୍କୁ ବଳି ଲଗାଇବା ପ୍ରଥା ପୂର୍ବପୁରୁଷରୁ ଚଳିଆସୁଛି । ଯେଉଁଥିପାଇଁ ଛତର ଯାତ୍ରା ବେଳେ ରକ୍ତରଞ୍ଜିତ ହୋଇପଡିଥାଏ ମାଆଙ୍କ ପୀଠ ।

ବହୁ ପ୍ରସିଦ୍ଧ ମାଆ ସୁନାଦେଇଙ୍କ ସାତ ଭଉଣୀ ରହିଛନ୍ତି । ସମଲେଶ୍ବରୀ, ଦ୍ୱାରସନୀ, ଇନ୍ଦ୍ରାଣୀ ଭଳି ମାଆମାନଙ୍କ ବିଭିନ୍ନ ନାମ ରହିଛି । ବିଭିନ୍ନ ଅଞ୍ଚଳର ଅଧିଷ୍ଠାତ୍ରୀ ଦେବୀ ରୂପେ ପୂଜା ପାଉଛନ୍ତି ଦେବୀ ମାଆଙ୍କ 7 ଭଉଣୀ । ଆଦିମ ଜନଜାତି ଚକୋଟିଆ ଭୁଞ୍ଜିଆଙ୍କ ଅଧିଷ୍ଠାତ୍ରୀ ଦେବୀ ଅଟନ୍ତି ମାଆ ସୁନାଦେଇ । ବର୍ଷକୁ ମାଆଙ୍କ 2 ଥର ଛତର ଯାତ୍ରା ହୋଇଥାଏ । ଚୈତ୍ରମାସରେ ଚୈତ୍ର ଛତର ଯାତ୍ରା ଏବଂ କୁମାର ପୂର୍ଣ୍ଣିମାରେ ଦଶହରା ଛତର ଯାତ୍ରା ପାଳିତ ହୋଇଥାଏ ।

ପ୍ରତିବର୍ଷ ଦଶହରା ଆମାବାସ୍ୟା ପ୍ରତିପଦା ତିଥିଠାରୁ ମାଆଙ୍କ ପୀଠରେ ମୁଖ୍ୟ ପୂଜକ ଦୀପ ପ୍ରଜ୍ଜ୍ୱଳନ କରି ଛତର ଯାତ୍ରା ପାଇଁ ଆହ୍ବାନ କରିଥାନ୍ତି । କୁମାର ପୂର୍ଣ୍ଣିମା ଛତର ଯାତ୍ରାରେ ମାଆ 484 ଟିକ୍ରି(ଗାଁ) ଗୌତିଆ ଗାଁ ମୁଖିଆଙ୍କଠାରୁ ବୋଦାବଳୀ ଖାଇଥାନ୍ତି । ଆଜିର ଦିନରେ 484 ଟିକ୍ରୀର ଗୌତିଆ ସେବାୟତ ମାନଙ୍କ ପ୍ରତିନିଧି ମାନେ ମାଆଙ୍କ ନିକଟରେ ନିଜ ନିଜର ଦୁଃଖ ଗୁହାରି କରିଥାଆନ୍ତି । ମାଆ ମଧ୍ୟ ଜଣ ଜଣ କରି ସମସ୍ତଙ୍କ ଗୁହାରି ଶୁଣି ଆଶୀର୍ବାଦ ଦେଇଥାନ୍ତି । କାହିଁ କେଉଁ ଆବାହନ କାଳରୁ ଏହି ପରମ୍ପରା ଚଲି ଆସିଛି ।

ଇଟିଭି ଭାରତ, ନୂଆପଡ଼ା