ନୟାଗଡ଼: ଅଙ୍ଗନବାଡି ଅଣ୍ଡା ଖାଇ ଅଚାନକ ଫୁଲିଗଲା ଗୋଡ଼ ହାତ । ଫଳରେ 2 ଶିଶୁ ଅସୁସ୍ଥ ହୋଇପଡ଼ିଛନ୍ତି । ନୟାଗଡ଼ ଓଡଗାଁ ବ୍ଲକ କୁରାଳ ପଞ୍ଚାୟତ କୁରାଳ ଗାଁର 2 ନମ୍ବର ଅଙ୍ଗନବାଡି କେନ୍ଦ୍ରରେ ଏହି ଘଟଣା ଘଟିଥିବାବେଳେ ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇ ଚିକିତ୍ସା କରାଯାଉଛି ।
ଏହି ଅଙ୍ଗନବାଡି କେନ୍ଦ୍ରରେ ପଢ଼ୁଥିବା କୁରାଳ ଗାଁର 2ଶିଶୁ ଶରତ ଚନ୍ଦ୍ର ପ୍ରଧାନଙ୍କ ପୁଅ ସୌମ୍ୟ ରଞ୍ଜନ ପ୍ରଧାନ ଏବଂ ମାନସ ପଢ଼ିଆରୀଙ୍କ ପୁଅ ଅମିତ ପଢ଼ିଆରୀ ଅସୁସ୍ଥ ହୋଇ କୁରାଳ ସ୍ବାସ୍ଥ୍ୟକେନ୍ଦ୍ର ଏବଂ ଓଡଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଚିକିତ୍ସିତ ହୋଇଛନ୍ତି । ଗତ 8 ତାରିଖରେ ପ୍ରତି ଶିଶୁ ପିଛା ମିଳିଥିଲା 10ଟି ଲେଖାଏଁ ଅଣ୍ଡା । ତେବେ ଉଭୟ ଶିଶୁ ଏହି ଅଣ୍ଡା ଖାଇବା ପରେ ସେମାନଙ୍କ ଗୋଡ଼ ହାତରେ ଫୋଟକା ହୋଇ ଫୁଲିବା ସହ ଜଳାପୋଡା ହେବାରୁ ସେମାନଙ୍କୁ ଡାକ୍ତରଖାନା ନେଇ ଚିକିତ୍ସା କରାଇବାକୁ ପଡିଥିଲା । ଏହି ନିମ୍ନମାନର ଅଣ୍ଡା କାରଣରୁ ଶିଶୁଙ୍କ ଏଭଳି ଅବସ୍ଥା ହୋଇଥିବା ସମ୍ପୃକ୍ତ ଅଙ୍ଗନବାଡି କର୍ମୀ ସ୍ବୀକାର କରିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ