ନବରଙ୍ଗପୁର: ଖରାରେ ଡହଳବିକଳ ଜନଜୀବନ । ଶୋଷ ମେଣ୍ଟାଇବାକୁ ନାହିଁ ମୁନ୍ଦିଏ ପାଣି । ଆଉ ପାଣି ଟିକକ ପାଇଁ କରିବାକୁ ପଡୁଛି ସଂଗ୍ରାମ । ଏନେଇ ବାରମ୍ବାର ଅଭିଯୋଗ ସତ୍ବେ କୌଣସି ଫଳ ନମିଳିବାରୁ ବାଧ୍ୟହୋଇ ନବରଙ୍ଗପୁର ମୁଖ୍ୟ ଜାତୀୟ ରାଜପଥକୁ ଓହ୍ଲାଇଛନ୍ତି ପାପଡାହାଣ୍ଡି ବ୍ଲକ ଝାଡ଼କୁସୁମୀ ଗ୍ରାମବାସୀ । ଫଳରେ କଳାହାଣ୍ଡି ଠାରୁ ନବରଙ୍ଗପୁର ଗାଡ଼ି ଚଳାଚଳ ଦୀର୍ଘ ସମୟଧରି ସମ୍ପୂର୍ଣ୍ଣ ଠପ ହୋଇଯାଇଥିଲା ।
ଭିଡିଓ ସୌଜନ୍ୟ: ସମ୍ବାଦଦାତା, ନବରଙ୍ଗପୁର
ଗାଁରେ ପ୍ରାୟ ୪ ଶହରୁ ଉର୍ଦ୍ଧ୍ବ ପରିବାର ବସବାସ କରୁଥିବା ବେଳେ କେବଳ ୪ଟି ନଳକୂପ ରହିଛି । ଆଉ ତାହାର ଅବସ୍ଥା ନକହିବା ଭଲ । କେଉଁଟା ଅଚଳ ହୋଇ ପଡିରହିଛି ତ ଆଉ କେଉଁଠି ଦୂଷିତ ପାନୀୟ ଜଳ ନିଷ୍କାସନ ହେଉଛି । ଯାହା ପିଇବା ଯୋଗ୍ୟ ନୁହଁ । ତେଣୁ କୌଣସି ଉପାୟ ନପାଇ ପାଖରେ ଥିବା ନଦୀରୁ କୁଣ୍ଡ ତିଆରି କରି ପାଣି ସଂଗ୍ରହ କରି ସେହି ପାଣିକୁ ବ୍ୟବହାର କରୁଛନ୍ତି ଗ୍ରାମବାସୀ । ଯଦ୍ବାରା ଗାଁର ବହୁ ଲୋକ ଅନେକ ରୋଗର ଶିକାର ହେଉଛନ୍ତି ।