ନବରଙ୍ଗପୁର: ରାସ୍ତା ଖରାପ ଯୋଗୁଁ ଖଟିଆରେ ବୁହା ହେଲେ ରୋଗୀ । ଏଭଳି ଦୃଶ୍ୟ ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ଉମରକୋଟ ବ୍ଲକ ସୁନାବେଡା ପଞ୍ଚାୟତର ବାଲିପଟା ଗାଁରେ । ରାସ୍ତା ଖରାପ ଯୋଗୁଁ ଅସୁସ୍ଥ ଥିବା ଜଣେ ବୃଦ୍ଧା ମାଣିକ ସାନ୍ତଙ୍କୁ ଖଟିଆରେ ଦୁଇ କିଲୋମିଟର ବୋହି ନେଇଥିଲେ ଗାଁ ଲୋକେ । ଏହାପରେ ଏକ ଅଟୋ ସାହାଯ୍ୟରେ ଅଣାଯାଇ ନିକଟସ୍ଥ ସୁନାବେଡ଼ା ପ୍ରାଥମିକ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଥିଲା। ସେଠାରୁ ତାଙ୍କୁ ଉମରକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେବାକୁ ପରାମର୍ଶ ଦେଇଥିଲେ।
ସୂଚନା ଯୋଗ୍ୟ ଯେ ଉମରକୋଟ ସଦର ମହକୁମା ଠାରୁ ମାତ୍ର ଦଶ କିଲୋମିଟରରେ ସୁନାବେଡ଼ା ପଞ୍ଚାୟତ । ବିକାଶ ଯେମିତି ଏହି ପଞ୍ଚାୟତର ଗ୍ରାମାଞ୍ଚଳକୁ ଅପହଞ୍ଚ । ବର୍ଷା ଋତୁ ଆସିବା ମାତ୍ରେ ଏହି ଅଞ୍ଚଳରେ ବସବାସ କରୁଥିବା ଜନସାଧାରଣଙ୍କ ଦୁର୍ଦ୍ଦଶା ବଢ଼ିଯାଏ । ବାହ୍ୟ ଜଗତରୁ ଏକ ପ୍ରକାର ବିଛିନ୍ନ ହୋଇ ଯାଏ ଏହି ଅଞ୍ଚଳ। ବାଲିପଟା ଗ୍ରାମବାସୀଙ୍କ କହିବା ଅନୁଯାୟୀ ରାସ୍ତା ସମସ୍ୟା ସମ୍ପର୍କରେ ଗ୍ରାମବାସୀ ବାରମ୍ବାର ପ୍ରଶାସନଙ୍କୁ ଜଣାଇଲେ ମଧ୍ୟ କୌଣସି ଲାଭ ହେଉ ନାହିଁ । ରୋଗରେ କେହି ଆକ୍ରାନ୍ତ ହେଲେ କିମ୍ବା ଗର୍ଭବତୀ ମହିଳାନଙ୍କୁ ଚିକିତ୍ସାଳୟ ନେବାକୁ ହେଲେ ବହୁତ ଅସୁବିଧାରେ ଖଟିଆରେ ନେବାକୁ ପଡୁଛି । ବାଲିପଟା ଗାଁ ଠାରୁ 2କିଲୋମିଟର ବୋହି ବୋହି ଆଣିବା ପରେ ଅଟୋ ରିକ୍ସା ସାହାଯ୍ୟରେ ସ୍ବାସ୍ତ୍ୟ କେନ୍ଦ୍ରକୁ ନିଆ ଯାଉଥିବା ରହିଛି ସୂଚନା।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ