ନବରଙ୍ଗପୁର: ଜିଲ୍ଲାରେ ଦେଖିବାକୁ ମିଳିଛି ଦାଦନ ଶ୍ରମିକର କରୁଣ କାହାଣୀ । ତାମିଲନାଡୁରୁ ନିଜ ଭିଟାମାଟିକୁ ଆସି ପାରୁନାହିଁ ଶ୍ରମିକର ମୃତଦେହ । ଏପରି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ପାତ୍ରୀ ପଞ୍ଚାୟତ ଅନ୍ତର୍ଗତ ଖୋଲିଗୁଡା ଗାଁରେ । ଶ୍ରମିକଙ୍କ ମୃତଦେହ ଫେରାଇ ଆଣିବାକୁ ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇଛନ୍ତି ମୃତ ଶ୍ରମିକଙ୍କ ପରିବାର ।
ସୂଚନାଅନୁସାରେ, ଖୋଲିଗୁଡା ଗାଁର ଦୀପ୍ତି ପ୍ରକାଶ ରୂପଚାନ୍ଦଙ୍କ ପୁଅ ଉରିଅ ରୂପଚାନ୍ଦ (27) କାମ ଧନ୍ଦା ଅଭାବରୁ ପରିବାରର ଭରଣ ପୋଷଣ ପାଇଁ ଦୁଇ ମାସ ତଳେ ତାମିଲନାଡୁର ଏସ.ସି.ଏମ ଗାର୍ମେଣ୍ଟସ ପ୍ରାଇଭେଟ ଲିମିଟେଡ଼ ନାମକ ଏକ କପଡା କମ୍ପାନୀରେ କାମ କରୁଥିଲେ । ଗତକାଲି ଉରିଅ ରୂପଚାନ୍ଦଙ୍କ ଏକ ସଡକ ଦୁର୍ଘଟଣାରେ ମୃତ୍ୟୁ ହୋଇଛି । ତାମିଲନାଡୁରୁ ତାଙ୍କ ମୃତଦେହ ଆଣିବା ଉରିଆଙ୍କ ପରିବାର ପକ୍ଷେ ଅସମ୍ଭବ ହୋଇଛି । ଏ ନେଇ ଜିଲ୍ଲାପାଳ ଓ ଜିଲ୍ଲା ଶ୍ରମ ବିଭାଗ ଅଧିକାରୀଙ୍କ ଦ୍ବାରସ୍ଥ ହୋଇଛନ୍ତି ଉରିଆଙ୍କ ପରିବାର । ଉରିଆଙ୍କର ଏକ ୬ ବର୍ଷର ଝିଅ ଓ ୩ ବର୍ଷର ପୁଅ ଅଛି ।