ନବରଙ୍ଗପୁର: ଜମି ବିବାଦକୁ ନେଇ ଟାଙ୍ଗିଆରେ ଆକ୍ରମଣ, ଜଣେ ଗୁରୁତର । ତେନ୍ତୁଳିଖୁଣ୍ଟି ଥାନା କଣ୍ଟାଗାଁ ପଞ୍ଚାୟତର ଗୁମରଦୋରା ଗାଁରେ ଅଭାବନୀୟ ଘଟିଛି । ଗୁରୁତର ଜଣକ ହେଲେ ସୁନାଧର ଜାନୀ। ଏନେଇ ଗୁରୁତର ସୁନାଧରଙ୍କର ପୁଅ ତେନ୍ତୁଳିଖୁଣ୍ଟି ଥାନାରେ ଏତଲା ଦାୟର କରିଛି ।
ସୂଚନାନୁଯାୟୀ, ରବିବାର ପ୍ରାୟ ଗୋଟେ ବେଳେ ସୁନାଧର ତାଙ୍କ ପତ୍ନୀଙ୍କ ସହ ଗାଁ ପାଖରେ ଥିବା ତାଙ୍କ ନିଜ ଚାଷ ଜମିରେ ହଳ କରିବାକୁ ଯାଇଥିଲେ । ଏହି ସମୟରେ ଗଣ୍ଡିଗୁଡା ଗାଁର ନରେନ୍ଦ୍ର ଗୌଡ ନାମକ ବ୍ୟକ୍ତି ଆସି ମୋ ଜମିରେ ହଳ କରୁଛୁ କହି ହଠାତ ସୁନାଧରକୁ ଟାଙ୍ଗିଆରେ ଆକ୍ରମଣ କରି ସେଠାରୁ ତୁରନ୍ତ ପଳାଇଥିଲେ । ଏହାପରେ ସୁନାଧରଙ୍କ ପତ୍ନୀ ପାଖରେ ଥିବା ଲୋକଙ୍କ ସାହାଯ୍ୟରେ ତାଙ୍କୁ ଗୁରୁତର ଅବସ୍ଥାରେ ପ୍ରଥମେ ତେନ୍ତୁଳିଖୁଣ୍ଟି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ। ସେଠାରେ ପ୍ରାଥମିକ ଚିକିତ୍ସା କରିବା ପରେ ତାଙ୍କ ଅବସ୍ଥା ଅଧିକ ସଙ୍କଟାପନ୍ନ ହେବାରୁ ଡାକ୍ତର ତାଙ୍କୁ ନବରଙ୍ଗପୁର ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରିଛନ୍ତି ।