ନବରଙ୍ଗପୁର:ଅସହାୟ ହୋଇ ପଡିଛି ନବରଙ୍ଗପୁର । ଏହି ଜିଲ୍ଲାରେ ମହିଳା ସୁରକ୍ଷିତ ନୁହଁନ୍ତି । ସ୍ବାସ୍ଥ୍ୟ ଶିକ୍ଷା ସବୁ ବିପର୍ଯ୍ୟସ୍ତ । ମହିଳାଙ୍କ ସାକ୍ଷରତା ମାତ୍ର 3 ପ୍ରତିଶତ । ଜିଲ୍ଲାରେ ବେକାରୀ ସମସ୍ୟା ରହିଛି । ପାଠ ପଢୁଥିବା ପିଲା ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି । ଡାକ୍ତରଖାନାରେ ଡାକ୍ତର ନାହାନ୍ତି ସ୍କୁଲରେ ଶିକ୍ଷକ ନାହାନ୍ତି । ରାସ୍ତା ନଥିବାରୁ ଗର୍ଭବତୀ ଖଟିଆରେ ବୁହା ହେଉଛନ୍ତି ହେଲେ ନମ୍ବର ୱାନ ଜିଲ୍ଲା ବୋଲି କହୁଛନ୍ତି ସରକାର । ଜିଲ୍ଲା କଂଗ୍ରେସର ନବରଙ୍ଗପୁର ବଞ୍ଚାଓ ଆନ୍ଦୋଳନରେ ରାଜ୍ୟ ସରକାରଙ୍କୁ ସମାଲୋଚନା କରି କିଛି ଏମତି କହିଛନ୍ତି ଜୟପୁର ବିଧାୟକ ତାରାପ୍ରସାଦ ବାହିନୀପତି ।
ବିଗତ କିଛି ଦିନ ଧରି ନବରଙ୍ଗପୁର ଜିଲ୍ଲାର ବିଭିନ୍ନ ସରକାରୀ ଅଧିକାରୀଙ୍କ କାର୍ଯ୍ୟକଳାପ ଜିଲ୍ଲାକୁ ଅପଦସ୍ଥ କରିଥିବା ବେଳେ ଜିଲ୍ଲାରେ ଅଫିସରଙ୍କ ଅରାଜକତା ଚଲାଇଥିବା ଅଭିଯୋଗ କରିଛି ଜିଲ୍ଲା କଂଗ୍ରେସ । ଏହାର ପ୍ରତିବାଦରେ ସୋମବାର ଜିଲ୍ଲା କଂଗ୍ରେସ ନବରଙ୍ଗପୁର ବଞ୍ଚାଅ ଆନ୍ଦୋଳନ ଆରମ୍ଭ କରିଛି । ଅତିରିକ୍ତ ଉପଜିଲ୍ଲାପାଳଙ୍କ ଘରେ ଭିଜିଲାନ୍ସ ଚଢ଼ାଉ, ସିନିଅର କ୍ଲର୍କଙ୍କୁ ସିଡିପିଓ ଚୌକିରୁ ଠେଲି ଦେବା ଓ ବ୍ଲକ କାର୍ଯ୍ୟାଳୟ ବାହାରେ ଅଭିଯୋଗ ଜଣାଇବାକୁ ଆସି ଲୋକେ ହନ୍ତସନ୍ତ ହେଉଥିବା ବେଳେ କାର୍ଯ୍ୟାଳୟ ପରିସର ଭିତରେ ବିଡ଼ିଓ ଜନ୍ମଦିନ ପାଳନ କରି କେକ୍ କାଟିବା ଭଳି ଅନେକ ଘଟଣା ଜିଲ୍ଲାକୁ ନିନ୍ଦିତ କରିଥିବା କହିଛି କଂଗ୍ରେସ ।