ନବରଙ୍ଗପୁର: ଚନ୍ଦାହାଣ୍ଡି ଘାଟି ନିକଟରେ କିଛି ସ୍କୁଲ ଛାତ୍ରଛାତ୍ରୀ ଓ ଅଭିଭାବକଙ୍କ ନେଇ ଯାଉଥିବା ଅଟୋ ଓଲଟି ପଡ଼ିଛି । ସେଥିରେ ଥିବା ୭ଜଣ ଛାତ୍ରଛାତ୍ରୀ ଆହତ ହୋଇଛନ୍ତି । ଚାରି ଜଣ ଆହତ ଓ ତିନି ଜଣଙ୍କ ଅବସ୍ଥା ଗୁରୁତର ରହିଥିବା ଜଣାପଡ଼ିଛି । ସମସ୍ତଙ୍କୁ ଝରିଗାଁ ଡାକ୍ତରଖାନାରେ ଭର୍ତ୍ତି କରାଯାଇଛି। ଦୁର୍ଘଟଣା ପରେ ଡ୍ରାଇଇଭ ଅଟୋ ସହ ଫେରାର ହୋଇଯାଇଛି ।
ଭିଡିଓ ସୌଜନ୍ୟ: ସମ୍ବାଦଦାତା ନବରଙ୍ଗପୁର
ସୂଚନା ଅନୁସାରେ ଝରିଗାଁ ବ୍ଲକର ଶିଉନାଗୁଡା ଗ୍ରାମରୁ ୫ମ ଶ୍ରେଣୀରେ ପଢୁ ୪ ଜଣ ଛାତ୍ରଛାତ୍ରୀଙ୍କୁ ନେଇ ତାଙ୍କ ଅଭିଭାବକ ପ୍ରବେଶିକା ପରୀକ୍ଷା ପାଇଁ ଚନ୍ଦାହାଣ୍ଡି ବ୍ଲକର ଧଡିପାଣି ଆଶ୍ରମ ସ୍କୁଲକୁ ଯାଉଥିବା ବେଳେ ଏହି ଅଘଟଣ ଘଟିଛି । ଅଭିଭାବକଙ୍କ କହିବା ଅନୁଯାୟୀ ଘାଟି ଓହ୍ଲାଇବା ସମୟରେ ଗାଡିର ବ୍ରେକ ଫେଲ୍ ହୋଇଯାଇଥିଲା । ଏହା ଜଣା ପଡ଼ିବା ପରେ ଜଣେ ଅଟୋରୁ ଡେଇଁ ପଡ଼ିଥିଲେ । ତା'ପରେ ଅଟୋଟି ଓଲଟି ପଡିଥିଲା । ସେତେବେଳେକୁ ସମସ୍ତେ ଗାଡ଼ିରୁ ତଳେ ପଡି ଯାଇଥିଲେ । କିନ୍ତୁ ଡ୍ରାଇଭର ଅଟୋକୁ ଧରି ଚମ୍ପଟ ମାରିଥିଲା ।