ରାଇରଙ୍ଗପୁର: ନିଖୋଜ ନାବାଳିକାଙ୍କ ଝୁଲନ୍ତା ମୃତଦେହ ଉଦ୍ଧାର । ଘଟଣାରେ ଜଣେ ଯୁବକକୁ ଗିରଫ କରିଛି ଟାଉନ ଥାନା ପୋଲିସ । ସୂଚନା ଅନୁଯାୟୀ, ମୟୂରଭଞ୍ଜ ଜିଲ୍ଲା ରାଇରଙ୍ଗପୁର ଟାଉନ ଥାନା ଅନ୍ତର୍ଗତ ଭାଲୁବସା ଗ୍ରାମର ଟାଣ୍ଡିସାହି କାଜୁ ଜଙ୍ଗଲର ଏକ ଗଛରୁ ଗତ ୫ ତାରିଖରେ କୃଷ୍ଣ ଚନ୍ଦ୍ର କାରୁଆଙ୍କ ନାବାଳିକା ଝିଅ ସନ୍ଧ୍ୟା କାରୁଆଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଥିଲା ।
ତେବେ ମୃତଦେହ ଉଦ୍ଧାର ହେବାର ଦୁଇ ଦିନ ପୂର୍ବରୁ ନାବାଳିକା ଜଣକ ନିଖୋଜ ଥିଲେ । ମୃତ ଦେହ ମିଳିବା ପରେ ତାଙ୍କୁ ହତ୍ୟା କରାଯାଇଥିବା ନେଇ ପରିବାର ଲୋକେ ରାଇରଙ୍ଗପୁର ଟାଉନ ଥାନାରେ ଅଭିଯୋଗ କରିଥିଲେ । ପୋଲିସ ଘଟଣାର ଛାନଭିନ ଜାରି ରଖିଥିବା ବେଳେ ଅମୂଲ୍ୟ ପାତ୍ର ନାମକ ଜଣେ ଯୁବକକୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡିଛି ।