ବର୍ଷାଋତୁ ପାଇଁ ନଭେମ୍ବର ପହିଲା ଯାଏଁ ଶିମିଳିପାଳ ବନ୍ଦ

ପ୍ରତିବର୍ଷ ଭଳି ଏବର୍ଷ ମଧ୍ୟ ବର୍ଷାଋତୁକୁ ଦୃଷ୍ଟିରେ ରଖି ରବିବାରଠାରୁ ନଭେମ୍ବର ପହିଲା ପର୍ଯ୍ୟନ୍ତ ପର୍ଯ୍ୟଟକଙ୍କ ପାଇଁ ବନ୍ଦ ରହିବ ଶିମିଳିପାଳ ଅଭୟାରଣ୍ୟ ।

ବାରିପଦା: ପ୍ରତିବର୍ଷ ଭଳି ଏବର୍ଷ ମଧ୍ୟ ବର୍ଷାଋତୁକୁ ଦୃଷ୍ଟିରେ ରଖି ରବିବାରଠାରୁ ନଭେମ୍ବର ପହିଲା ପର୍ଯ୍ୟନ୍ତ ପର୍ଯ୍ୟଟକଙ୍କ ପାଇଁ ବନ୍ଦ ରହିବ ଶିମିଳିପାଳ ଅଭୟାରଣ୍ୟ । ଏନେଇ ବିଭାଗ ପକ୍ଷରୁ ମିଳିଥିବା ସୂଚନା ଅନୁସାରେ ଶିମିଳିପାଳକୁ ପୂର୍ବ ବର୍ଷ ତୁଳନାରେ ଏବର୍ଷ ଅଧିକ ବିଦେଶୀ ପର୍ଯ୍ୟଟକ ଆସିଛନ୍ତି । ଏଥିସହ ଚଳିତ ବର୍ଷରେ ସର୍ବାଧିକ ଆୟ ଏକ କୋଟିରୁ ଉର୍ଦ୍ଧ୍ବ ହୋଇଥିବା ମଧ୍ୟ ସୂଚନା ଦେଇଛି ବନ ବିଭାଗ ।

ଗଣନା ଅନୁଯାୟୀ 2017 ନଭେମ୍ବର ପହିଲାରୁ 2018 ଜୁନ୍‌ 15 ପର୍ଯ୍ୟନ୍ତ 33 ହଜାର 401 ଜଣ ପର୍ଯ୍ୟଟକ ଶିମିଳିପାଳ ଭିତରକୁ ପ୍ରବେଶ କରିଥିଲେ ଏବଂ ସେଥିରେ 11 ଜଣ ବିଦେଶୀ ପର୍ଯ୍ୟଟକ ରହିଥିଲେ । ଅନ୍ୟପଟେ 2018 ନଭେମ୍ବର ପହିଲାରୁ 2019 ଏପ୍ରିଲ ମାସ ମଧ୍ୟରେ 28 ହଜାର 882 ଜଣ ପର୍ଯ୍ୟଟକ ଶିମିଳିପାଳ ପରିଦର୍ଶନରେ ଆସିଥିବା ବେଳେ ସେମାନଙ୍କ ମଧ୍ୟରୁ 30 ଜଣ ବିଦେଶୀ ପର୍ଯ୍ୟଟକ ରହିଛନ୍ତି ।

ଶିମିଳିପାଳକୁ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ବଢ଼ିବା ନିଶ୍ଚିତ ଗର୍ବର କଥା । ଅଭୟାରଣୟରେ ବିଭିନ୍ନ ପ୍ରକାରର ବନ୍ୟପ୍ରଣୀ, ସରୀସୃପ, ବିରଳ ପକ୍ଷୀ ଓ ଜୈବ ବିବିଧତା ପାଇଁ ସାରା ବିଶ୍ବରେ ପ୍ରସିଦ୍ଧି ଲାଭ କରିଛି । ଏଠାକୁ ଆସୁଥିବା ପର୍ଯ୍ୟଟକମାନେ ପ୍ରକୃତିର ମନଲୋଭା ଦୃଶ୍ୟ ସାଙ୍ଗକୁ ଅତି ନିକଟରୁ ବନ୍ୟପ୍ରାଣୀଙ୍କୁ ଦେଖିବାର ସୁଯୋଗ ପାଇଥାନ୍ତି ।

ତେଣୁ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଶିମିଳିପାଳରେ ଜାମୁଆଣି, କୁମାରୀ, ଗୁଡ଼ୁଗୁଡ଼ିଆ ଓ ରାମତୀର୍ଥରେ ଟେଣ୍ଟ, ବାମ କଟେଜ୍ , ଆଦିବାସୀ କୁଡିଆ ଓ ମଜା ନିର୍ମାଣ କରାଯାଇଛି । ଏଗୁଡିକରେ ରାତ୍ରିଯାପନ କରିବାକୁ ହେଲେ ଆଗୁଆ ଅନଲାଇନ ବୁକିଂ କରିବାକୁ ପଡ଼ିଥାଏ ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ