ବାରିପଦା: ସମସ୍ୟା ଘେରରେ ଦ୍ବିତୀୟ ଶ୍ରୀକ୍ଷେତ୍ର । ରଥଯାତ୍ରା ପାଖେଇ ଆସୁଥିବା ବେଳେ ପ୍ରଶାସନ ନୀରବ । ଏହାକୁ ପ୍ରତିବାଦ କରି ଚାଲିଥିବା ପଦଯାତ୍ରା କାଠପାଳ ନିକଟରେ ବୁଧବାର ସ୍ଥଗିତ ହୋଇଛି ।
ବୁଧବାର ସକାଳୁ ଜଗନ୍ନାଥ ମନ୍ଦିର ସେବାୟତଙ୍କ ସହ ରଥ କାରିଗର, ରଥ ମହାରଣା ମିଶି 50 ଜଣ ଜଗନ୍ନାଥ ମନ୍ଦିରରୁ ନବୀନ ନିବାସ ଅଭିମୁଖେ ପଦଯାତ୍ରା ଆରମ୍ଭ କରିଥିଲେ । 8 ଦଫା ଦାବିରେ ଏହି ପଦଯାତ୍ରା ଆରମ୍ଭ ହୋଇଥିଲା ।
ରାଜ୍ୟ ସରକାରଙ୍କ ରାଜସ୍ଵ ଓ ବିପର୍ଯ୍ୟୟ ମନ୍ତ୍ରୀ ସୁଦାମ ମାରାଣ୍ଡି ସେବାୟତଙ୍କୁ 18 ନମ୍ବର ଜାତୀୟ ରାଜପଥ କାଠପାଳ ନିକଟରେ ଅଟକାଇ ଆଲୋଚନା କରିଥିଲେ । ମନ୍ତ୍ରୀ ଭୁବନେଶ୍ୱର ଯାଇ ଜଗନ୍ନାଥ ମନ୍ଦିରର ବିଭିନ୍ନ ସମସ୍ୟା ସମ୍ପର୍କରେ ମୁଖ୍ୟମନ୍ତ୍ରୀଙ୍କ ସହ ଆଲୋଚନା କରିବା ସହ ଆସନ୍ତା 30 ତାରିଖ ମଧ୍ୟରେ ସବୁ ସମସ୍ୟାର ସମାଧାନ କରିବେ ବୋଲି ପ୍ରତିଶ୍ରୁତି ଦେଇଛନ୍ତି । ମନ୍ତ୍ରୀଙ୍କ ପ୍ରତିଶ୍ରୁତି ପରେ ସେବାୟତ, ରଥ କାରିଗର ଓ ରଥ ମହାରଣା ପଦଯାତ୍ରାରୁ ଓହରିଛନ୍ତି ।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ