ବାରିପଦା: ଦିନ ଦ୍ବିପ୍ରହରରେ ଗହଣା ଦୋକାନରୁ ଲୁଟ୍ । ସମସ୍ତଙ୍କୁ ଚକମା ଦେଇ ଦୋକାନରେ କଳାକନା ବୁଲାଇଛନ୍ତି ଦୁର୍ବୃତ୍ତ । ଏହି ଘଟଣାଟି ଘଟିଛି ମୟୂରଭଞ୍ଜ ଜିଲ୍ଲା ବୈଶିଙ୍ଗା ବଜାରରେ ଥିବା ବିଶ୍ଵକର୍ମା ଜୁଏଲାରୀ ଦୋକାନରେ ।
ଦିନ ଦ୍ବିପ୍ରହରରେ ଗୁଳିକାଣ୍ଡ ଓ ଏସିଡ୍ ମାଡ, 3 ଲୁଟେରାଙ୍କୁ ନିସ୍ତୁକ ଛେଚିଲେ ଲୋକେ ଅପରାହ୍ନ ସମୟରେ ୨ଟି ପଲସରେ ୬ ଜଣ ଡ଼କାୟତ ଗହଣା ଦୋକାନରେ ପହଞ୍ଚିଥିଲେ । ଏହାପରେ ଦୋକାନରେ ଥିବା ବାପା ଓ ପୁଅଙ୍କୁ ବନ୍ଧୁକ, ମାରଣାସ୍ତ୍ର ଏବଂ ଏସିଡ ଆକ୍ରମଣ କରି ସୁନାରୂପା ଗହଣା ଓ ନଗଦ ଟଙ୍କା ନେଇ ଚମ୍ପଟ ମାରିଥିଲେ ।
ଗହଣା ଦୋକାନୀ ଡ଼କାୟତମାନଙ୍କୁ ପ୍ରତିରୋଧ କରିବାକୁ ଯାଇଥିବା ବେଳେ ଦୋକାନୀ ମାଲିକଙ୍କ ଗୋଡ଼ରେ ଗୁଳି ବାଜିଥିବା ବେଳେ ମାଲିକଙ୍କ ପୁଅକୁ ଏସିଡ ମାଡ ହୋଇଛି ।
ଆହତ ବାପା ଓ ପୁଅକୁ ପ୍ରଥମେ ବୈଶିଙ୍ଗା ଡାକ୍ତରଖାନାରେ ଭର୍ତ୍ତି କରାଯାଇଥିଲା ପରେ ଗୁରୁତର ହେବାରୁ ଅଧିକ ଚିକିତ୍ସା ପାଇଁ ବାଲେଶ୍ଵର ମୁଖ୍ୟ ଚିକିତ୍ସାଳୟକୁ ପଠାଇ ଦିଆଯାଇଛି ।
ଦୁର୍ବୃତ୍ତମାନେ ଡକାୟତି କରି ଖସି ପାଳାଉଥିବା ସମୟରେ ପାଖ ଦୋକାନୀ ମାନେ ଗୋଟିଏ ବାଇକକୁ ଅଟକ ରଖିବାରେ ସକ୍ଷମ ହୋଇଥିବା ଜଣାପଡ଼ିଛି । ସେଥିରେ ଥିବା 3 ଜଣ ଦୁର୍ବୃତ୍ତଙ୍କୁ ସ୍ଥାନୀୟ ଲୋକେ କାବୁ କରି ନିସ୍ତୁକ ମାଡ ମାରିଛନ୍ତି । ପୋଲିସ ପହଞ୍ଚି ଆହତଙ୍କୁ ଡାକ୍ତରଖାନାକୁ ନେଇଛି ।
ମୟୂରଭଞ୍ଜ ଏସପି ଘଟଣାସ୍ଥଳରେ ପହଞ୍ଚି ଅଧିକ ତଦନ୍ତ ଜାରିରଖିଛନ୍ତି । ଏହାସହ ଅନ୍ୟ ତିନିଜଣ ଡକାୟତଙ୍କୁ ଧରିବା ପାଇଁ ପୋଲିସ ପକ୍ଷରୁ ତିନିଟି ଟିମ ଗଠନ କରାଯାଇ ଜିଲ୍ଲାର ବିଭିନ୍ନ ସ୍ଥାନରେ ଚଢ଼ାଉ ଜାରି ରହିଛି ବୋଲି କହିଛନ୍ତି ମୟୁରଭଞ୍ଜ ଏସପି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
