ଅନ୍ଧବିଶ୍ବାସର ପୂଜାର୍ଚ୍ଚନା:ଡାକ୍ତରଖାନାରେ ମୃତଦେହକୁ ଝଡାଫୁଙ୍କା କରୁଛି ଗୁଣିଆ

ଗୋଟିଏ ପଟେ ମଣିଷ ବିଜ୍ଞାନ ବଳରେ ଚନ୍ଦ୍ରପୃଷ୍ଠରେ ପହଞ୍ଚିଲା ବେଳକୁ ଅନ୍ୟପଟେ ଅନ୍ଧବିଶ୍ବାସର ବଶବର୍ତ୍ତୀ ହେଉଥିବା ଦେଖିବାକୁ ମିଳୁଛି । ସାପ କାମୁଡାରେ ମୃତ ମହିଳାଙ୍କୁ ବଞ୍ଚାଇବା ପାଇଁ ଡାକ୍ତରଖାନା ପରିସରରେ ଝଡାଫୁଙ୍କା କରିଛି ଗୁଣିଆ । ଏଭଳି ଦୃଶ୍ୟ ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲାର ଉଦଳା ଡାକ୍ତରଖାନାରେ।

ବାରିପଦା: ପୁଣି ଅନ୍ଧବିଶ୍ଵାସର ଅନ୍ଧ ଗଳିରେ ମଣିଷ । ସାପ କାମୁଡାରେ ମୃତ ମହିଳାଙ୍କୁ ବଞ୍ଚାଇବା ପାଇଁ ଡାକ୍ତରଖାନା ପରିସରରେ ହୋଇଛି ଝଡାଫୁଙ୍କା । ଏଭଳି ଘଟଣା ଘଟିଛି ମୟୂରଭଞ୍ଜ ଜିଲ୍ଲାର ଉଦଳା ଡାକ୍ତରଖାନା ପରିସରରେ।

ଉଦଳା ଥାନା ଅଧିନସ୍ଥ କାଠପାଳ ଗ୍ରାମର ଆରତୀ ମାଝୀ ନିଜ ଘର ବାଡିରେ କୁଟା ସଂଗ୍ରହ କରୁଥିବା ବେଳେ ଗତକାଲି ସନ୍ଧ୍ୟାରେ ଏକ ବିଷାକ୍ତ ସାପ କାମୁଡିଥିଲା । ଆରତୀ ଘଟଣା ବାବଦରେ ପରିବାର ଲୋକଙ୍କୁ ଜଣାଇବା ପରେ ପ୍ରଥମେ ଘରେ ଏକ ଗୁଣିଆ ଦ୍ଵାରା ଝଡାଫୁଙ୍କା କରାଯାଇଥିଲା ।

ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ଚିକିତ୍ସା ପାଇଁ ଉଦଳା ଡାକ୍ତରଖାନାରେ ଭର୍ତ୍ତି କରାଯାଇଥିଲା । ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ। ଏତିକିରେ ସରିନଥିଲା ଅନ୍ଧବିଶ୍ବାସ । ଡାକ୍ତରଖାନା ପରିସରରେ ପୁଣି ଥରେ ଗୁଣିଆର ସାହାରା ନେଇ ଝଡ଼ାଫୁଙ୍କା କରିଥିଲେ । ହେଲେ ଗୁଣିଆ ମଧ୍ୟ ଆରତୀଙ୍କୁ ବଞ୍ଚାଇବାରେ ବିଫଳ ହୋଇଥିଲା।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ