ବାରିପଦା : ବାଲି ଚୋରା ଚାଲାଣବେଳେ ଟ୍ରାକ୍ଟର ଓଲଟି ଜଣେ ନାବାଳକର ମୃତ୍ୟୁ ହୋଇଥିବା ଜଣାପଡିଛି । ଏଭଳି ଏକ ଅଭାବନୀୟ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ଶାମାଖୁଣ୍ଟା ବ୍ଲକ୍ ଅନ୍ତର୍ଗତ ଟିକରପୋଡା ଗାଁରେ । ଗାଁ ନିକଟ ବୁଢ଼ାବଳଙ୍ଗ ନଦୀରୁ ବାଲି ଚୋରି କରି ଆସୁଥିବାବେଳେ ଟ୍ରାକ୍ଟର ଓଲଟି ପଡିବାରୁ ଜଣେ ନାବାଳକର ଘଟଣାସ୍ଥଳରେ ମୃତ୍ୟୁ ହେଇଯାଇଛି । ମୃତକ ଜଣକ ହେଉଛନ୍ତି ଟିକରପୋଡା ଗ୍ରାମର ସୁଖ ସିଂଙ୍କ ୧୪ ବର୍ଷର ପୁଅ ଶିବ ସିଂ ବୋଲି ଜଣାପଡ଼ିଛି।
ସୂଚନା ଅନୁଯାୟ ବୁଢ଼ାବଳଙ୍ଗ ନଦୀ ବାରୁଣୀ ଘାଟରୁ ଗତକାଲି ବିଳମ୍ବିତ ରାତିରେ ବେଆଇନ ଭାବେ ବାଲି ଚୋରି କରି ଆଣୁଥିବା ସମୟରେ (OD 01S 9213) ନମ୍ବର ବିଶିଷ୍ଟ ଏକ ଟ୍ରାକ୍ଟର ଓଲଟି ନାବାଳକ ଶ୍ରମିକ ଜଣଙ୍କ ଆହତ ହେଇଥିଲେ। ତେବେ ଖବର ପାଇ ବାରିପଦା ଅଗ୍ନିଶମ ବିଭାଗ ଓ ବାରିପଦା ସଦର ପୋଲିସ ଘଟଣାସ୍ଥଳରେ ପହଞ୍ଚି ଗୁରୁତର ଆହତ ନାବାଳକ ଜଣଙ୍କୁ ପଣ୍ଡିତ ରଘୁନାଥ ମୁର୍ମୁ ମେଡିକାଲ କଲେଜ ଓ ହସ୍ପିଟାଲକୁ ଆଣିଥିଲେ। ତେବେ ସେଠାରେ ଆହତ ନାବାଳକକୁ ଡାକ୍ତର ମୃତ ଘୋଷଣା କରିଥିଲେ। ତେବେ ଶାମାଖୁଣ୍ଟା ବ୍ଲକ୍ ଅଞ୍ଚଳରେ ବୁଢ଼ାବଳଙ୍ଗ ନଦୀରୁ ସକାଳ ଓ ସନ୍ଧ୍ୟାରେ ଶହ ଶହ ଟ୍ରିପ ବାଲି ଚୋରା ଚାଲାଣ ହେଉଥିବାବେଳେ ପ୍ରଶାସନ ପଦକ୍ଷେପ ନେବାକୁ ବିଭିନ୍ନ ମହଲରୁ ଦାବି ହେଉଛି ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
