ମାଲକାନଗିରି: ଶୃଙ୍ଖଳିତ ଭାବରେ ଚାଲିଛି ପାଠ ପଢା । ପିଲାଏ ବି ମନ ଧ୍ୟାନ ଦେଇ ପାଠ ପଢୁଛନ୍ତି । ଏମିତି ଲାଗୁଛି ଯେମିତି ଏହା କୌଣସି ସ୍କୁଲ କିମ୍ବା ଟ୍ୟୁସନ ସେଣ୍ଟର । ହେଲେ ଆପଣ ଜାଣି ଖୁସି ହେବେ, ଏହି କୁନି ଛାତ୍ରଛାତ୍ରୀଙ୍କ ଶିକ୍ଷକମାନେ ବି ଛାତ୍ର। ମାଲକାନଗିରି ଜିଲ୍ଲାର ଡଙ୍ଗସଖାଲର ଅଞ୍ଚଳରେ ତିନି ଆଦିବାସୀ ଯୁବକ ନେଇଛନ୍ତି ଏହି ନିଆରା ପଦକ୍ଷେପ । କୋରୋନା ଯୋଗୁଁ ସ୍କୁଲ ବନ୍ଦ ଥିବାରୁ ସ୍ବଇଚ୍ଛାରେ ଛାତ୍ରଛାତ୍ରୀଙ୍କୁ ପାଠ ପଢାଇବା ଭାର ମୁଣ୍ଡାଇଛନ୍ତି । ତାହା ବି ସମ୍ପୂର୍ଣ୍ଣ ମାଗଣା । ଉଦ୍ଦେଶ୍ୟ କେବଳ ପିଲାଙ୍କୁ ଶିକ୍ଷିତ କରିବା । ଯୁକ୍ତ ତିନି ବିଜ୍ଞାନ ଶେଷ ବର୍ଷ ଛାତ୍ର ଦୁଲା ବାଞ୍ଜାମି, ଯୁକ୍ତ ଦୁଇର ଦୁଇ ଜଣ ଛାତ୍ର ସୁରେଶ ମାଡକାମୀ ଓ କିଶୋର ମାଡକାମୀ। ନିଜ ପାଠ ପଢା ସାରି ଦୈନିକ 4 ରୁ 5 ଘଣ୍ଟା ପ୍ରଥମରୁ ଅଷ୍ଟମ ଶ୍ରେଣୀ ଛାତ୍ରଛାତ୍ରୀଙ୍କୁ ପାଠ ଶିକ୍ଷାଦାନ କରୁଛନ୍ତି । ଗାଁରେ ଥିବା କମ୍ୟୁନିଟି ସେଣ୍ଟରକୁ ବିଦ୍ୟାଳୟର ରୂପ ଦେଇ ପାଠ ପଢ଼ାଉଥିବା ଦେଖିବାକୁ ମିଳିଛି।
କମ୍ୟୁନିଟି ସେଣ୍ଟରରେ ଭବିଷ୍ୟତ ଗଢ଼ା, 70ରୁ ଉର୍ଦ୍ଧ୍ବ ପିଲାଙ୍କୁ ଶିକ୍ଷା ଦାନ କରୁଛନ୍ତି ଆଦିବାସୀ ଯୁବକ