ମାଲକାନଗିରି: ୨ ବର୍ଷ ରେ ପାଦ ଥାପିଲା ଗୁରୁପ୍ରିୟା । ସ୍ବାଭିମାନ ଅଞ୍ଚଳର ଲାଇଫ ଲାଇନ କୁହାଯାଉଥିବା ଗୁରୁପ୍ରିୟା ସେତୁକୁ ପୁରିଛି ଦୁଇ ବର୍ଷ । ଦୁଇ ବର୍ଷ ମଧ୍ୟରେ ସ୍ବାଭିମାନ ଅଞ୍ଚଳରେ ସେତେଟା ଉନ୍ନତି ହୋଇନଥିଲେ ମଧ୍ୟ କିଛି ପଞ୍ଚାୟତ ସଦର ମହକୁମାକୁ ସଂଯୋଗୀକରଣ ହୋଇପାରିଛି । କିନ୍ତୁ ଏବେ ବି ଅନେକ ଅଞ୍ଚଳ ଅପହଞ୍ଚ ଥିବା ବେଳେ ଲୋକଙ୍କ ପାଖରେ ପହଞ୍ଚିପାରିନି ମୌଳିକ ସୁବିଧା ।
୨ ବର୍ଷରେ ପାଦ ଥାପିଲା ଗୁରୁପ୍ରିୟା, ଲୋକଙ୍କ ପାଖରେ ପହଞ୍ଚିପାରିନି ମୌଳିକ ସୁବିଧା ଲାଲଗଡ ଭାବେ ପରିଚିତି ସ୍ବାଭିମାନ ଅଞ୍ଚଳ ଗୁରୁପ୍ରିୟା ସେତୁ ପରେ ତିନୋଟି ନୂତନ କ୍ୟାମ୍ପ ପ୍ରତିଷ୍ଠା ହେବା ସହ ଗୋଟିଏ ମୋଡେଲ ପୋଲିସ ଷ୍ଟେସନ ମଧ୍ୟ ସ୍ଥାପନ କରିଛି ପୋଲିସ ବିଭାଗ । ଲାଲ ବାହିନୀକୁ ମାତ ଦେଇ ସ୍ବାଭିମାନ ଅଞ୍ଚଳରେ ପ୍ରଥମ ଥର ପାଇଁ ତ୍ରିରଙ୍ଗା ଉଡାଇଛି ମାଲକାନଗିରି ପୋଲିସ । କିନ୍ତୁ ଏବେ ବି ସେହି ଅଞ୍ଚଳରେ ଲାଲ ବାହିନୀର ଦବଦବା ଥିବା ବେଳେ ଧିରେ ଧିରେ ଏହାର ସମାଧାନ କରାଯିବ ବୋଲି ଏସପି କହିଥିବା ବେଳେ ଜିଲ୍ଲାପାଳ କହିଛନ୍ତି ସେହି ଅଞ୍ଚଳରେ ଅନେକ ବିକାଶ ମୂଳକ କାର୍ଯ୍ୟ ହୋଇଛି । ଆସନ୍ତା ୨୦୨୩ ମସିହା ପୂର୍ବରୁ ସ୍ବାଭିମାନ ଅଞ୍ଚଳ ସମସ୍ତ ଅଞ୍ଚଳକୁ ବିକାଶ ପହଞ୍ଚିଯିବ ବୋଲି ଜିଲ୍ଲାପାଳ କହିଛନ୍ତି ।
ବିଛିନ୍ନାଞ୍ଚଳବାସୀଙ୍କର ବର୍ଷ ବର୍ଷର ସ୍ବପ୍ନ ଥିବା ଗୁରୁପ୍ରିୟା ସେତୁ ଆଉ ଏହି ସେତୁ ହେବା ପରେ ବିଛିନ୍ନାଞ୍ଚଳ ନାମ ପରିବର୍ତ୍ତନ ହୋଇ ହେଲା ସ୍ବାଭିମାନ ଅଞ୍ଚଳ । କିନ୍ତୁ ଇତି ମଧ୍ୟରେ ବିତିଯାଇଛି ଦୁଇ ବର୍ଷ ଦୁଇ ବର୍ଷ ମଧ୍ୟରେ କେତେ ପରିମାଣର ବିକାଶ ପରିଲକ୍ଷିତ ହୋଇପାରି ନାହିଁ । ଅଳ୍ପ କିଛି ଗାଁକୁ ପିଚୁ ରାସ୍ତା ହୋଇଥିବା ବେଳେ ଅନ୍ୟ କିଛି ପଞ୍ଚାୟତ ସଦର ମହକୁମାକୁ ମାଟି ରାସ୍ତା ସଂଯୋଗ କରିଛି ଜିଲ୍ଲା ପ୍ରଶାସନ ।ଏବେ ବି ଅନେକ ଅଞ୍ଚଳ ପୂର୍ବପରି ଅପହଞ୍ଚ ହୋଇ ରହିଛି ।
ଜିଲ୍ଲାପାଳ କହିଛନ୍ତି ଗୁରୁପ୍ରିୟା ସେତୁ ହେବା ପରେ ସମସ୍ତ ପଞ୍ଚାୟତ ସଦର ମହକୁମାକୁ ରାସ୍ତା ଯୋଗେ ସଂଯୋଗୀକରଣ କରାଯାଇଛି । ୩୫୦ଟି ନଳକୂପ ଖୋଳିବା ସହ ପ୍ରତ୍ୟେକ ବର୍ଷ ଏକ କୋଟି ମାଛ ଯାଆଁଳା ଜଳଭଣ୍ଡାରରେ ଛଡାଯାଉଛି । ଏହା ସହ ସେହି ଅଂଚଳର ଲୋକଙ୍କ ବଞ୍ଚିବା ଶୈଳୀ କିଭଳି ପରିବର୍ତ୍ତନ ହେବ ଏଥି ପାଇଁ ଯୋଜନା ପ୍ରସ୍ତୁତ ହେଉଛି । ଲୋକଙ୍କୁ ନରେଗା ଓ ଅନ୍ୟ ଯୋଜନାରେ ସାମିଲ କରାଯାଇ ତାଙ୍କର ମାନଦଣ୍ଡକୁ ସୁଦୃଢ କରାଯାଉଛି । ଏହାସହ ଜଳସେଚନ ବ୍ୟବସ୍ଥାକୁ ମଧ୍ୟ ଦୃଢ କରାଯାଉଛି ।
ମାଲକାନଗିରିରୁ ଦେବଦତ୍ତ ବେହେରା,ଇଟିଭି ଭାରତ
