ମାଲକାନଗିରି: ଜିଲ୍ଲାରେ ଚାଲିଛି ସାରର କଳା ବଜାରୀ । ଜିଲ୍ଲାରେ ଚାଷ କାର୍ଯ୍ୟ ଜାରି ରହିଥିବା ବେଳେ ଚାଷୀ ମାନେ ନାନାଦି ହଇରାଣ ହରକତ ହେଉଥିବା ନେଇ ନଜରକୁ ଆସିଛି । ଅସାଧୁ ବେପାରୀ ୨୭୦ ଟଙ୍କାର ସାର ବସ୍ତାକୁ ୬୦୦ ଟଙ୍କା ମାଗିବା ନେଇ ଅଭିଯୋଗ ଆଣିଛନ୍ତି ଚାଷୀ । ଗରିବ ଆଦିବାସୀ ଲୋକେ ସରକାରଙ୍କ ରିହାତି ମୁଲ୍ୟରେ ସାର ପାଉନଥିବା ବେଳେ ଦଲାଲଙ୍କ ପାଖରେ ଗଚ୍ଛିତ ହୋଇ ରହିଛି ଶହ ଶହ ବସ୍ତା ସାର ।
ସାର କଳା ବଜାରୀ ଅଭିଯୋଗରେ କୃଷି ଅଧିକାରୀଙ୍କ ଦ୍ବାରସ୍ଥ ହେଲେ ଚାଷୀ ଚାଷୀଙ୍କ ପାଇଁ ସରକାର ୟୁରିଆ(UREA) ସାରର ମୁଲ୍ୟ ୨୭୦ ଟଙ୍କା ଧାର୍ଯ୍ୟ କରିଥିବା ବେଳେ ଦଲାଲ ମାନେ ଏହାକୁ ବଜାରରେ ଉଚ୍ଚା ଦରରେ ବିକ୍ରି କରୁଛନ୍ତି । ଜିଲ୍ଲାର ସିଆଇଡିମାଳ ଗାଁର ଭବେନ ହାଲଦାର ନାମକ ଜଣେ ବ୍ୟକ୍ତି ୟୁରିଆ ସାରର ଏପରି କଳା ବଜାରୀ କରୁଥିବା ବେଳେ ଗାଁ ଲୋକେ ଏକାଠି ହୋଇ ସାର ଗୋଦାମରେ ତାଲା ପକାଇବା ପରେ ଆନ୍ଦୋଳନ ଆରମ୍ଭ କରିଛନ୍ତି ।
ଭବେନ ହାଲଦାରଙ୍କୁ ଗିରଫ କରିବା ଲାଗି ଗାଁ ଲୋକେ ପୋଲିସ ଓ କୃଷି ବିଭାଗକୁ ସୂଚନା ଦେଇଛନ୍ତି । ଗରିବ ଆଦିବାସୀ ଲୋକେ ୬୦୦ ଟଙ୍କା ଦରରେ ୟୁରିଆ ସାର ବସ୍ତା କିଣିବା ଫଳରେ ଫସଲ ଅମଳ ହେବା ପରେ କିଛି ବି ଳାଭ ହେବନାହିଁ ବୋଲି ଚାଷୀ ମାନେ ଦୃଢୋକ୍ତି ଦେଇଛନ୍ତି । ପରେ ଏ ଘଟଣାରେ ଜିଲ୍ଲା କୃଷି ଅଧିକାରୀଙ୍କୁ ଅବଗତ କରିବା ପରେ ତଦନ୍ତ ଆରମ୍ଭ କରିଛନ୍ତି । ଏବଂ ତା ସହିତ କଳା ବଜାରୀ କରୁଥିବା ଲୋକଙ୍କ ପ୍ରତି କଡା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୃଷି ଅଧିକାରି କହିଛନ୍ତି । ଏହା ସହ ଜିଲ୍ଲାର ସମସ୍ତ ଗରିବ ଲୋକଙ୍କୁ ରିହାତି ମୁଲ୍ୟରେ ସାର ଯୋଗାଇଦେବାକୁ ମଧ୍ୟ ସେ ପ୍ରତିଶୃତି ଦେଇଛନ୍ତି ।
ସେପଟେ ଜିଲ୍ଲାର ସମସ୍ତ ଦୋକାନରେ ୟୁରିଆ ସାର ମହଜୁଦ୍ ରହିଥିବା ବେଳେ ଚାଷୀଙ୍କ ଲାଗି ଫେଡରେସନରେ ୧୭୫ ମେଟ୍ରିକ ଟନ୍ ସାର ଗଚ୍ଛିତ ରହିଥିବା ଜିଲ୍ଲା କୃଷି ଅଧିକାରି ସୁଚନା ଦେଇଛନ୍ତି । ତେଣୁ କୌଣସି ଚାଷୀ ଠକାମିର ଶିକାର ନହୋଇ ସରକାରୀ ଦୋକାନରୁ ସାର କିଣିବା ଲାଗି ପରାମର୍ଶ ଦେଇଛନ୍ତି ।
ମାଲକାନଗିରିରୁ ପଞ୍ଚାନନ ଦାସ, ଇଟିଭି ଭାରତ
