ମାଲକାନଗିରି: ପୋଖରୀରେ 2 ଶିଶୁଙ୍କ ମୃତ୍ୟୁ । ମାଲକାନଗିରି ଜିଲ୍ଲା କାଲିମେଳା ବ୍ଳକ ସୀମାନ୍ତ ମୋଟୁ ଥାନା ଅନ୍ତର୍ଗତ ପୁଷୁଗୁଡା ପଞ୍ଚାୟତର ମୁକାନପାଲ୍ଲୀ ଗ୍ରାମରେ ପୋଖରୀରେ ବୁଡି ଦୁଇ ଶିଶୁଙ୍କର ମୃତ୍ୟୁ ଘଟିଛି । ମୃତ ଦୁଇ ଶିଶୁ ଦୁଇ ଭଉଣୀ ବୋଲି ଜଣାପଡିଛି ।
ସୁଚନା ଅନୁଯାୟୀ, ମୁକାନପାଲ୍ଲୀ ଗ୍ରାମର ଉପେଲ ଗଙ୍ଗାଙ୍କ ସ୍ତ୍ରୀ ଘରଠାରୁ ଅଳ୍ପ ଦୂରରେ ଥିବା ବିଲକୁ ଧାନ କାଟିବାକୁ ଯାଇଥିଲେ । ତାଙ୍କ ସାଙ୍ଗରେ ଦୁଇ ଝିଅ ମଧ୍ୟ ବିଲକୁ ଯାଇଥିଲେ l ମା ଜଣଙ୍କ ବିଲରେ ଧାନ କାଟୁଥିବା ସମୟରେ ଦୁଇ ଶିଶୁ ପାଖରେ ଥିବା ଏକ ଗାଡିଆ ବା ଚୁଆ ନିକଟରେ ବସିଥିଲେ ।
ଏହି ସମୟରେ ସାନ ଝିଅଟି ଖେଳୁ ଖେଳୁ ପୋଖରୀ ଭିତରକୁ ପଡି ଯାଇଥିଲା । ଭଉଣୀ ପାଣିରେ ବୁଡି ଯାଉଥିବା ଦେଖି ବଡ ଭଉଣୀ ତାକୁ ରକ୍ଷା କରିବା ପାଇଁ ପାଣିକୁ ଯାଇଥିଲା । ଫଳରେ ପାଣିରେ ବୁଡି ଦୁଇ ଶିଶୁଙ୍କର ମୃତ୍ୟୁ ଘଟିଛି ।
ମୃତ ଦୁଇ ଶିଶୁଙ୍କ ମଧ୍ୟରେ ଜଣଙ୍କର ବୟସ ୩ ବର୍ଷ ହୋଇଥିବାବେଳେ ଅନ୍ୟଜଣକର ୬ ବର୍ଷ ବୋଲି ସୂଚନା ମିଳିଛି । ଘଟଣା ପରେ ମୁକାନପାଲ୍ଲୀ ଅଞ୍ଚଳରେ ଶୋକର ଛାୟା ଖେଳିଯାଇଛି l ଖବର ପାଇ ମୋଟୁ ଥାନା ଅଧିକାରୀ ସୁଶାନ୍ତ କୁମାର ସାହୁ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିବା ସହ ଦୁଇ ଶିଶୁଙ୍କ ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛନ୍ତି l
ମାଲକାନଗିରିରୁ ଦେବଦତ୍ତ ବେହେରା, ଇଟିଭି ଭାରତ