ବାରିପଦା: ମୟୂରଭଞ୍ଜ ମୁଖ୍ୟ ଚିକିତ୍ସାଳୟରେ ରୋଗୀ ଅଣଦେଖା ଅଭିଯୋଗ । କୋରୋନା ଆଳ ଦେଖାଇ ରୋଗୀଙ୍କୁ ଚିକିତ୍ସା ମିଳୁନଥିବା ଅଭିଯୋଗ କରିଛନ୍ତି ଖୋଦ 108 କର୍ମଚାରୀ । ବାରିପଦା ସ୍ଥିତ ରଘୁନାଥ ମୁର୍ମୁ ମେଡିକାଲ କଲେଜରେ ରୋଗୀଙ୍କୁ ଡାକ୍ତରଖାନାରେ ଭର୍ତ୍ତି କରିବା ବଦଳରେ ବାର ଦ୍ବାର ଶୁଣ୍ଡିପିଣ୍ଡା ହେବାକୁ ପଡୁଛି । ଚିକିତ୍ସା ଯୋଗାଇବାକୁ ପ୍ରାୟ ଦେଢ ଘଣ୍ଟା ଲାଗି ସମୟ ଲାଗିଯାଉଛି । ଫଳରେ ଅନେକ ରୋଗୀଙ୍କ ଚିକିତ୍ସା ଅଭାବରୁ ମୃତ୍ୟୁ ହେଉଥିବା ଅଭିଯୋଗ ହୋଇଛି ।
ଆଦିବାସୀ ବହୁଳ ମୟୂରଭଞ୍ଜ ଜିଲ୍ଲାରେ ପୂର୍ବରୁ ଚିକିତ୍ସା ଅବହେଳାରୁ ଅନେକ ରୋଗୀଙ୍କ ଜୀବନ ଯାଉଥିବାର ଅଭିଯୋଗ ହୋଇଆସିଛି । ଆଜି ଜଣେ ଜିଅନ୍ତା ପୋଡି ଯାଇଥିବା ମହିଳାଙ୍କୁ ଡାକ୍ତରଖାନାରେ ଭର୍ତ୍ତି କରିବାକୁ 108 କର୍ମଚାରୀ ଡାକ୍ତରଖାନାରେ ପହଞ୍ଚିଥିଲେ । ସେମାନେ ପ୍ରଥମେ କାଜୁଆଲିଟିରେ ନେଇଥିଲେ ହେଲେ ସେଠାରୁ ତାଙ୍କୁ ଫେରାଇ ଦେବା ପରେ ସର୍ଜରୀ ବିଭାଗକୁ ନେବାକୁ କହିଥିଲେ । ଏହା ପରେ 108 କର୍ମଚାରୀମାନେ ଓପିଡି ବିଭାଗକୁ ନେଇଥିଲେ ମଧ୍ୟ ଏଠାରେ ସରିନି ରୋଗୀ ହନ୍ତସନ୍ତ । ଟିକଟ କରି ଆଣ, ବିନା ମୋବାଇଲ ନମ୍ବର ଟିକଟ ହେବ ନାହିଁ ଏପରି ନାନା ଆଳ କରି ରୋଗୀଙ୍କ ଚିକିତ୍ସାରେ ଅବେହଳା କରାଯିବା 108 କର୍ମଚାରୀ ନାନା ହଇରଣ ହରକତର ସାମ୍ନା କରିବାକୁ ପଡୁଛି ।