କୋରାପୁଟ: ବାପାଙ୍କ ଅଧୁରା ସ୍ଵପ୍ନକୁ ସାକାର କରିବା ପାଇଁ କୋରାପୁଟରୁ ଦାମନଯୋଡ଼ି ଦୌଡ଼ିଲେ ଜୟପୁରର ତିନି ଶିଶୁ । କୋରାପୁଟ ଜିଲ୍ଲା ପୋଲିସ ମୁଖ୍ୟ କାର୍ଯ୍ୟାଳୟଠାରୁ ବାହାରି ଜୟପୁରର ଯମୁନା, ତପସ୍ୟା ଓ ହରିଶ ବାହାଦୁର ପାଖାପାଖି ୩୫ କିଲୋମିଟର ବାଟ ଅତିକ୍ରମ କରି ଦାମନଯୋଡି ପର୍ଯ୍ୟନ୍ତ ସଫଳତାର ସହ ଦୌଡ଼ିବାରେ ସକ୍ଷମ ହୋଇଛନ୍ତି ।
ଯମୁନାର ବୟସ ୧୧ ବର୍ଷ ହୋଇଥିବା ବେଳେ ତପସ୍ୟା ଓ ହରିଶଙ୍କ ବୟସ ୧୦ ବର୍ଷରୁ କମ ବୋଲି ବାପା ଜିତେନ୍ଦ୍ର ବାହାଦୂର କହିଛନ୍ତି । ରବିବାର ସକାଳ ୭ଟା ବେଳେ କୋରାପୁଟରୁ ବାହାରିଥିବା ଏହି ତିନି ଶିଶୁ ୩୫ କିଲୋମିଟର ବାଟକୁ ୪ ଘଣ୍ଟା ୩୫ ମିନିଟ ସମୟ ମଧ୍ୟରେ ଅତିକ୍ରମ କରିଥିବା ସେମାନଙ୍କ ତାଲିମଦାତା ରାମଚନ୍ଦ୍ର ଜେନା ସୂଚନା ଦେଇଛନ୍ତି । ବାପା ଜିତେନ୍ଦ୍ର ବାହାଦୁର ଦିନେ ଭାରତୀୟ ସେନାରେ ଯୋଗ ଦେବାପାଇଁ ସ୍ଵପ୍ନ ଦେଖିଥିଲେ । ଭାରତୀୟ ସେନାରେ ଯୋଗଦେଇ ଦେଶର ସେବା କରିବା ପାଇଁ ସଂକଳ୍ପ ନେଇଥିଲେ ମଧ୍ୟ ଜିତେନ୍ଦ୍ର ନିଜ ସ୍ବପ୍ନ ସାକାର କରପାରି ନଥିଲେ । କିଛି ପାରିବାରିକ କାରଣରୁ ନିଜ ସ୍ଵପ୍ନକୁ ଏଡାଇ ଦେଇ ଜୟପୁରରେ ଏକ ରାତ୍ରି ଜଗୁଆଳି ଭାବେ ସେ କାର୍ଯ୍ୟ କରିଆସୁଛନ୍ତି । ତେବେ ନିଜ ୩ ସନ୍ତାନଙ୍କ ମାଧ୍ୟମରେ ସେହି ଅଧୁରା ସ୍ବପ୍ନକୁ ସାକାର କରିବା ପାଇଁ ଶତଚେଷ୍ଟା କରିଛନ୍ତି ଜିତେନ୍ଦ୍ର । ଜୟପୁର ସହରରେ ପଡିଆ ମଧ୍ୟରେ ଜିତେନ୍ଦ୍ର ପିଲାଙ୍କୁ ପ୍ରତିଦିନ ଦୌଡ ଅଭ୍ୟାସ କରାଉଛନ୍ତି ।