ବ୍ଲାକମେଲିଂରେ ଅତିଷ୍ଠ ହୋଇ ଶିକ୍ଷକଙ୍କ ଆତ୍ମହତ୍ୟା

କୋରାପୁଟ ଜିଲ୍ଲା  ଶିକ୍ଷାଧିକାରୀଙ୍କ  ସରକାରୀ ବାସଭବନରେ  ଶିକ୍ଷକ ଚିତ୍ତରଞ୍ଜନ ପଣ୍ଡାଙ୍କ ଆତ୍ମହତ୍ୟା କରିବା ସହରରେ ଚାଞ୍ଚଲ୍ୟ ସୃଷ୍ଟି କରିଛି । ମୃତ୍ୟୁର କାରଣ ଅସ୍ପଷ୍ଟ ଥିବାବେଳେ ପ୍ରାଥମିକ ତଦନ୍ତ ସମୟରେ ଏକ ସୁଇସାଇଡ ନୋଟ ଜବତ ହୋଇଛି ।

କୋରାପୁଟ: ଜିଲ୍ଲା ଶିକ୍ଷାଧିକାରୀଙ୍କ ସରକାରୀ ବାସଭବନରେ ଶିକ୍ଷକ ଚିତ୍ତରଞ୍ଜନ ପଣ୍ଡାଙ୍କ ଆତ୍ମହତ୍ୟା ଘଟଣା ସହରରେ ଚାଞ୍ଚଲ୍ୟ ସୃଷ୍ଟି କରିଛି । ଏନେଇ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରି ତଦନ୍ତ ଆରମ୍ଭ କରିଛି ।

ସୂଚନାନୁଯାୟୀ, ଆଜି ସକାଳୁ ଜିଲ୍ଲା ଶିକ୍ଷାଧିକାରୀ ପ୍ରମୋଦ କୁମାର ପଣ୍ଡା କୌଣସି କାମରେ ବାହାରକୁ ଯାଇଥିଲେ । ହେଲେ ଘରର ଚାବି ତାଙ୍କ କାର୍ଯ୍ୟାଳୟରେ କାର୍ଯ୍ୟରତ ଶିକ୍ଷକ ଚିତ୍ତରଞ୍ଜନ ପଣ୍ଡାଙ୍କ ପାଖରେ ଥିଲା । ପରେ ସେ ତାଙ୍କ ବାସଭବନରେ ପଶି ଦଉଡି ଲଗାଇ ଆତ୍ମହତ୍ୟା କରିଥିଲେ ।

ପ୍ରାଥମିକ ତଦନ୍ତରେ ଚିତ୍ତରଞ୍ଜନଙ୍କ ହାତଲେଖା ସୁଇସାଇଡ ନୋଟ ଜବତ କରିଛି ପୋଲିସ । ଯେଉଁଥିରେ 8 ଜଣ ବ୍ୟକ୍ତିଙ୍କର ନାମ ରହିଛି । ସେମାନେ ତାଙ୍କୁ କୌଣସି ଫାଇଲକୁ କୌଶଳ କ୍ରମେ ଅକ୍ତିଆର କରିବା ପାଇଁ ଗତ କିଛିଦିନ ଧରି ବ୍ଲାକମେଲିଙ୍ଗ କରୁଥିବା ଲେଖାଯାଇଛି । ଚିଠିରେ ଏହି 8 ଜଣଙ୍କୁ ଚିତ୍ତରଞ୍ଜନ ତାଙ୍କ ମୃତ୍ୟୁ ପାଇଁ ଦାୟୀ କରିଛନ୍ତି । ସେଥିରେ ଅଫିସର କିଛି କର୍ମଚାରୀଙ୍କ ସମେତ ଦୁଇଜଣ ସାମ୍ବାଦିକଙ୍କ ନାଁ ରହିଥିବା ଜଣାପଡିଛି । ତେବେ ମୃତ୍ୟୁର ପ୍ରକୃତ କାରଣ ଜାଣିବା ପାଇଁ ପୋଲିସର ତଦନ୍ତ ଜାରି ରହିଛି ।

କୋରାପୁଟରୁ ସି ଏଚ ଶାନ୍ତାକାର, ଇଟିଭି ଭାରତ