କୋରାପୁଟ: ଜିଲ୍ଲାରେ ବିଗତ ୨୫ ବର୍ଷ ହେବ ବିନା ଭିତ୍ତିଭୂମିରେ ଚାଲିଛି ଧାନକିଣା। ସରକାର ଚାଷୀଙ୍କ ଠାରୁ ଆରଏମସି ମାଧ୍ୟମରେ ଧାନ କିଣୁଥିବାଲେ ସୁଦ୍ଧା ଏପର୍ଯ୍ୟନ୍ତ ସୁଧୁରି ପାରିନି ଧାନ ମଣ୍ଡି ଗୁଡିକର ଅବସ୍ଥା । ଯାହା ଅତ୍ୟନ୍ତ ଦୁଖର ବିଷୟ ବୋଲି କହିଛନ୍ତି କୃଷକ କଲ୍ୟାଣ ମଞ୍ଚର ସଭାପତି ନରେନ୍ଦ୍ର କୁମାର ପ୍ରଧାନ ।
ବୁଧବାର ଖରିଫ ଧାନ କ୍ରୟ ନିମନ୍ତେ ଜିଲ୍ଲାପ୍ରଶାସନ, ମିଲର, ଚାଷୀ ଏବଂ ସ୍ବୟଂସହାୟକ ଗୋଷ୍ଠୀ ମଧ୍ୟରେ ହୋଇଥିବା ସମନ୍ବୟ ବୈଠକରେ ଯୋଗଦେଇଥିଲେ ନରେନ୍ଦ୍ର ପ୍ରଧାନ । ବୈଠକ ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ସେ କହିଛନ୍ତି, ବିକ୍ରି ହୋଇଥିବା ଧାନ ବିନିମୟରେ ସରକାରଙ୍କଠାରୁ ପାଇବାକୁ ଥିବା ଅର୍ଥ, ଚାଷୀ ଠିକ ସମୟରେ ପାଇ ପାରୁନାହାଁନ୍ତି । ଯାହା ଫଳରେ ସେମାନେ ମୁକ୍ତ ବଜାରରେ ଦଲାଲଙ୍କ ହାତକୁ ନିଜ ଉତ୍ପାଦକୁ ଅତି କମ ଦାମରେ ବିକ୍ରି କରିଦେଉଥିବା ଅଭିଯୋଗ କରିଛନ୍ତି ସେ ।
ଜୟପୁର ବିଧାୟକ ତାରାପ୍ରସାଦ ବାହିନୀପତି ମଧ୍ୟ ଅନୁରୂପ ଅଭିଯୋଗ ଆଣି କହିଛନ୍ତି, ଜୟପୁର ନିୟନ୍ତ୍ରିତ ବଜାର କମିଟି ( ଆରଏମସି) ପ୍ରତି ବର୍ଷ ୧୦ କୋଟି ଟଙ୍କା ଅର୍ଜନ କରୁଛି । କିନ୍ତୁ ମଣ୍ଡିର ମାନ କାହିଁକି ବୃଦ୍ଧି କରାଯାଉ ନାହିଁ ବୋଲି ପ୍ରଶ୍ନ କରିଛନ୍ତି ସେ । ସେ ଆହୁରି କହିଛନ୍ତି, ଧାନର ଏଫଏକ୍ୟୁ ମାପ କରିବା ପାଇଁ ଉଦ୍ଦିଷ୍ଟ ଥିବା ମେସିନ ନ ଆଣି ଚାଷୀଙ୍କୁ ହଇରାଣ କରିବା ନିନ୍ଦନୀୟ ଘଟଣା।
ଭିଡିଓ ସୌଜନ୍ୟ: ସମ୍ବାଦଦାତା, କୋରାପୁଟ ସେପଟେ ଚଳିତ ବର୍ଷ ଖରିପ ଧାନ ବିକ୍ରୟ ପାଇଁ 26,830 ଜଣ ଚାଷୀ ପଞ୍ଜିକୃତ ହୋଇଥିବା ଜିଲ୍ଲା ଯୋଗାଣ ଅଧିକାରୀ ତୁଳାରାମ ନାୟକ ସୂଚନା ଦେଇଛନ୍ତି । ସେ କହିଛନ୍ତି, ଜିଲ୍ଲାରେ ଚାଷୀଙ୍କ ପାଇଁ ଖୋଲାଯାଇଥିବା ମଣ୍ଡି ଗୁଡିକ ନଭେମ୍ବର 15 ତାରିଖରୁ ଆରମ୍ଭ ହୋଇ ଆସନ୍ତା ବର୍ଷ ମାର୍ଚ୍ଚ 31 ପର୍ଯ୍ୟନ୍ତ ଖୋଲା ରହିବ । ମଣ୍ଡି ଗୁଡିକରୁ ସମୁଦାୟ କେତେ ଧାନ କ୍ରୟ କରାଯିବ ତାହା ଚୂଡାନ୍ତ ହୋଇନଥିଲେ ମଧ୍ୟ ଚାଷୀଙ୍କ ଠାରୁ ମୋଟା ଧାନ କ୍ବିଣ୍ଟାଲ ପିଛା 1815 ଟଙ୍କା ଓ ଗ୍ରେଡ-ଏ ଧାନ କ୍ବିଣ୍ଟାଲ ପିଛା 1835 ଟଙ୍କା ଦେଇ କିଣିବାକୁ ନିଷ୍ପତ୍ତି ନିଆଯାଇଥିବା ସେ ସ୍ପଷ୍ଟ କରିଛନ୍ତି ।
କୋରାପୁଟରୁ ସି.ଏଚ ଶାନ୍ତାକାର, ଇଟିଭି ଭାରତ
