କୋରାପୁଟ: କଥାରେ ଅଛି ସ୍ମୃତି ସର୍ବଦା ମନେ ରୁହେ । ଆଉ ଯଦି ସେହି ସ୍ମୃତି ଛୋଟବେଳର ଥାଏ ତାହା ହେଲେ ଆଜୀବନ ମନେ ରହିବା ତ ନିଶ୍ଚିତ । ଏମିତି ଏକ କାହାଣୀ ଏବେ ଦେଖିବାକୁ ମିଳିଛି କୋରାପୁଟ ମାଛକୁଣ୍ଡରେ । ପିଲାଦିନର ବିତାଇଥିବା ସେହି ସ୍ବର୍ଣ୍ଣିମ ସମୟକୁ ପୁଣିଥରେ ମନେ ପକାଇବାକୁ ଏବେ ମାଛକୁଣ୍ଡରେ ପହଞ୍ଚିଛନ୍ତି ବିଦେଶୀ ଦମ୍ପତ୍ତି ।
କିମିଆ କରିଛି କୋରାପୁଟ, 69 ବର୍ଷ ପରେ ମାଛକୁଣ୍ଡରେ ବିଦେଶୀ ଦମ୍ପତ୍ତି
ଛୋଟ ମୋର ଗାଁଟି । ଭୂଗୋଳ ପୋଥି ପତରେ ପଛେ ନଥାଉ ତାର ନାଁଟି । ଛୋଟ ମୋର ଗାଁଟି । ବୋଧହୁଏ ଏହି ମର୍ମର କିଛି କବିତା ଇଂରେଜ ଦମ୍ପତ୍ତିଙ୍କ ହୃଦୟକୁ ଆନ୍ଦୋଳିତ କରିଛି । ଯାହାଫଳରେ ସେମାନେ ସୁଦୂର ଲଣ୍ଡନରୁ କୋରାପୁଟ ଜିଲ୍ଲାର ମାଛକୁଣ୍ଡରେ ପାଦ ରଖିଛନ୍ତି । ରିଚାର୍ଡ ଗୋଲଡ଼ ଓ ତାଙ୍କ ପତ୍ନୀ ଜେନିଫର ଏସ ଗୋଲଡ଼ । ମାଛକୁଣ୍ଡ ମାଟିରେ ପାଦ ଦେବା କ୍ଷଣି ୬୯ ବର୍ଷ ତଳର ଇତିହାସ ତାଙ୍କୁ ବେଶ ଆନନ୍ଦ ଦେଇଛି । ଦିନ ଥିଲା ଛୋଟ ବେଳେ ଏହି ମାଟି ମାଆ କୋଳରେ ଖେଳିବୁଲି ସମୟ ବିତାଇଥିଲେ । ସମୟ ସିନା ବଦଳିଛି ହେଲେ ମନରେ ଥିବା ସେଇ ପ୍ରେମ ଆଉ ସେ ସ୍ନେହ ନା କମିଛି ନା ବଦଳିଛି ।