କୋରାପୁଟ: ରାଜ୍ୟ ବିଧାନସଭାରେ ଜୟପୁର ବିଧାୟକ ତାରାପ୍ରସାଦ ବାହିନୀପତି କୋରାପୁଟ ଜିଲ୍ଲାରେ ପାଇପ ଯୋଗେ ଜଳ ଯୋଗାଣ ବ୍ୟବସ୍ଥାରେ ଅଧାରୁ ଅଧିକା ଅଚଳ ହୋଇପଡିଥିବା ଅଭିଯୋଗ କରିଥିଲେ । ଏହାସହ ଅନେକ ଗ୍ରାମରେ ଏ ପର୍ଯ୍ୟନ୍ତ ସରକାରଙ୍କ ଦ୍ବାରା ଶୁଦ୍ଧ ପାନୀୟ ଜଳ ପହଞ୍ଚାଇବାର ପ୍ରତିଶ୍ରୁତି ପାଳନ ହୋଇନଥିବା ଅଭିଯୋଗ କରିଥିଲେ ବିଧାୟକ । ତେବେ ଗାଁ ଗଣ୍ଡାର ବାସ୍ତବ ସ୍ଥିତି ପରଖିବା ପାଇଁ କୋରାପୁଟ ନିକଟସ୍ଥ କୋଲାବ ଗାଁରେ ଯାଇ ପହଞ୍ଚିଥିଲା ଇଟିଭି ଭାରତ କ୍ୟାମେରା ଟିମ।
ଦୂର ହୋଇ ନାହିଁ କୋଲାବ ଗାଁର ଜଳକଷ୍ଟ
ଗାଁରେ ଅଛନ୍ତି 80ଟି ପରିବାର । ଗାଁରୁ ଅନତିଦୂରରେ ରହିଛି ବିଶାଳ କୋଲାବ ଜଳଭଣ୍ଡାର । ସରକାର ସାମାନ୍ୟ ଇଚ୍ଛା ପ୍ରକାଶ କରିଥିଲେ ପାଇପ ଯୋଗେ ଜଳ ଯୋଗାଣ କରିବାରେ ତିଳେମାତ୍ର ଅସୁବିଧା ହୁଅନ୍ତା ନାହିଁ । କିନ୍ତୁ ସମଗ୍ର ଗାଁର ଆବାଳ ବୃଦ୍ଧ ବନିତାଙ୍କୁ ଗୋଟିଏ ମାତ୍ର ନଳକୂଅରେ ସନ୍ତୁଷ୍ଟ ହେବାପାଇଁ ଛାଡ଼ିଦେଇ, ପ୍ରଶାସନ ଶାନ୍ତିର ନିଶ୍ବାସ ମାରୁଥିବା ଭଳି ଲାଗୁଛି ।