କୋରାପୁଟ: ପଦ୍ମଶ୍ରୀ ଉପାଧିରେ ଭୂଷିତ କମଳା ପୂଜାରୀ ଆଜି ନିଜ ଗାଁ ପାତ୍ରପୁଟକୁ ଫେରିଛନ୍ତି । ତାଙ୍କର ଏହି ଫେରିବା ବାଟରେ କୋରାପୁଟ ଠାରେ ତାଙ୍କୁ ଜିଲ୍ଲାବାସୀଙ୍କ ତରଫରୁ ଅତିରିକ୍ତ ଜିଲ୍ଲାପାଳ ଦେବେନ ପ୍ରଧାନ ସମ୍ବର୍ଦ୍ଧିତ କରିଛନ୍ତି । ଜିଲ୍ଲାର ଏକ ଛୋଟ ଅଖ୍ୟାତ ଗ୍ରାମ ପାତ୍ରପୁଟ ଗାଁରେ ଜୈବିକ ପଦ୍ଧତିରେ ପାରମ୍ପରିକ ଚାଷବାସ କରି ଚର୍ଚ୍ଚାକୁ ଆସିଥିଲେ। ଅନ୍ୟପଟେ ଜୟପୁରସ୍ଥିତ ସ୍ବାମୀନାଥନ ଫାଉଣ୍ଡେସନର ସକ୍ରିୟ ସହଯୋଗରେ ୩ଶହରୁ ଊର୍ଦ୍ଧ୍ୱ ପାରମ୍ପରିକ ଧାନକୁ ସଂରକ୍ଷଣ କରିବା ପାଇଁ ସୁଯୋଗ ମିଳିଥିଲା।
ସଂସ୍ଥାର ସହଯୋଗରେ ୨୦୦୨ ମସିହାରେ ଜୋହେନ୍ସ ବର୍ଗରେ ଅନୁଷ୍ଠିତ ଆନ୍ତର୍ଜାତୀୟ ସମ୍ମିଳନୀରେ ଯୋଗଦେଇ ପାରମ୍ପରିକ ଓ ଜୈବିକ ଚାଷ ସମ୍ପର୍କରେ ତାଙ୍କ ଅନୁଭୂତିକୁ ବାଣ୍ଟିଥିଲେ । ତାଙ୍କର ଏହି ଅନନ୍ୟ ପ୍ରତିଭାକୁ ସମ୍ମାନ ଜଣାଇ ରାଜ୍ୟ ସରକାର ତାଙ୍କୁ ରାଜ୍ୟ ଯୋଜନା ବୋର୍ଡର ସଦସ୍ୟ ଭାବେ ନିଯୁକ୍ତ କରିଛନ୍ତି । ତେବେ ନିଜ ପେଟ ଚାଖଣ୍ଡକ ପାଇଁ ଓ ପରିବାର ବର୍ଗର ଭରଣ ପୋଷଣ ପାଇଁ ଏ ପର୍ଯ୍ୟନ୍ତ ସରକାରଙ୍କ ଦ୍ୱାରା ତାଙ୍କ ପାଇଁ କୌଣସି ମାସିକ ଭତ୍ତା ଦେବାର ଯୋଜନା କାର୍ଯ୍ୟକାରୀ କରାଯାଇନଥିବା ସମସ୍ତଙ୍କୁ ଚିନ୍ତିତ କରିଛି ।