ଖୋର୍ଦ୍ଧା: ଜିଲ୍ଲାରେ ସକ୍ରିୟ ଜମି ଦଲାଲ । ଏମାନଙ୍କ ଲୋଲୁପ ଦୃଷ୍ଟି ଏବେ ସରକାରୀ,ଦେବୋତ୍ତର,ଗୋଚର ଓ ଶ୍ମଶାନ ଜମି ଉପରେ । ତେଣୁ ସବୁଠି ଏମାନେ ଧିରେ ଧିରେ ଜବରଦଖଲ କରିବାରେ ଲାଗିଲେଣି । ଖୋର୍ଦ୍ଧା ଜିଲ୍ଲା ସିକୋ ଅଞ୍ଚଳେରେ ଏପରି କିଛି ଅଭିଯୋଗ ସାମ୍ନାକୁ ଆସିଛି । ସ୍ଥାନୀୟ ସିକୋ ଅଞ୍ଚଳରେ ଦେବତ୍ତୋର ସମ୍ପତ୍ତି ଜବରଖଲ ମୁକ୍ତ କରିବା ପାଇଁ RIଙ୍କ କାର୍ଯ୍ୟାଳୟ ମାମନାରେ ଧାରଣା ଦେଲେ ଗ୍ରାମ କମିଟି ସଦସ୍ୟ ।
ଅଭିଯୋଗ ଅନୁସାରେ, ସ୍ଥାନୀୟ ଅଞ୍ଚଳର ଗ୍ରାମ୍ୟ ଠାକୁର ପତିତପାବନଙ୍କ ଦୋଳ ପଡିଆକୁ ଦଲାଲ ଓ କିଛି ସ୍ଥାନୀୟ ଖଳପ୍ରକୃତିର ଲୋକ ଜବରଦଖଲ କରି ରଖିଛନ୍ତି । ଯାହାଫଳରେ ଦୀର୍ଘଦନ ହେବ ଠାକୁରଙ୍କ ବିଭିନ୍ନ କାର୍ଯ୍ୟକ୍ରମରେ ବାଧା ଉପୁଜିଛି । ଏନେଇ ଉକ୍ତ ଜମିରୁ ଜବରଦଖଲକାରୀଙ୍କୁ ଉଚ୍ଛେଦ ଦାବି କରିଛି ସିକୋ ଗ୍ରାମ୍ୟ କମିଟି । ଆଜି କମିଟି ପକ୍ଷରୁ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟ ଘେରାଉ ଓ ପ୍ରତିବାଦ ସଭା କରାଯାଇଛି । ଶତାଧିକ ଗ୍ରାମବାସୀ ଏହି ପ୍ରତିବାଦ ସଭାରେ ସାମିଲ ହୋଇ, ଉକ୍ତ ଜମିକୁ ଜବରଦଖଲ ମୁକ୍ତ କରିବା ପାଇଁ ଅଡିବସିଛନ୍ତି । ପ୍ରଶାସନ ଏ ଦିଗରେ କାର୍ଯ୍ୟାନୁଷ୍ଠାନ ଗ୍ରହଣ ନ କଲେ, ଆଗାମୀ ଦିନରେ ଆନ୍ଦୋଳନ ବ୍ୟାପକ ହେବା ସହ ଭୟାବହ ପରିସ୍ଥିତି ସୃଷ୍ଟି ହେବା ନେଇ ଚେତାବନୀ ଦେଇଛି ଗ୍ରାମ କମିଟି ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ
