ଜନ ଔଷଧି କେନ୍ଦ୍ର ପରିଦର୍ଶନ କରି ସ୍ଥିତି ଅନୁଧ୍ୟାନ କଲେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ

ରବିବାର ବରମୁଣ୍ଡା ସ୍ଥିତ ପ୍ରଧାନମନ୍ତ୍ରୀ ଜନ ଔଷଧି କେନ୍ଦ୍ର ପରିଦର୍ଶନ କରିଥିଲେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ମନସୁଖ ମାଣ୍ଡଭୀୟ । ଗ୍ରାହକଙ୍କ ସହ କଥା ହେବା ସହ କେନ୍ଦ୍ରର ସ୍ଥିତି ଅନୁଧ୍ୟାନ କରିଥିଲେ । ଅଧିକ ପଢନ୍ତୁ

ଭୁବନେଶ୍ବର: ଜନ ଔଷଧି କେନ୍ଦ୍ର (Jan Aushadhi ) ପରିଦର୍ଶନ କଲେ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ । ଗତକାଲି(ରବିବାର) ବରମୁଣ୍ଡା ସ୍ଥିତ ପ୍ରଧାନମନ୍ତ୍ରୀ ଜନ ଔଷଧି କେନ୍ଦ୍ରର ସ୍ଥିତି ଅନୁଧ୍ୟାନ କରିଛନ୍ତି କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ଡ.ମନସୁଖ ମାଣ୍ଡଭିୟ (Union Health Minister Mansukh Mandaviya) । ଜନ ଔଷଧି ଉପଲବ୍ଧ ଠାରୁ ଆରମ୍ଭ କରି ଗ୍ରାହକଙ୍କ ଆଗ୍ରହ ପର୍ଯ୍ୟନ୍ତ ସମସ୍ତ ଦିଗ ଉପରେ ସେ ତଥ୍ୟ ସଂଗ୍ରହ କରିଛନ୍ତି ।

ପରିଦର୍ଶନ ପରେ ସ୍ବାସ୍ଥ୍ୟମନ୍ତ୍ରୀ କହିଛନ୍ତି, "ସମସ୍ତଙ୍କ ପାଖରେ ଗୁଣାତ୍ମକ ଔଷଧ ପହଞ୍ଚିବା ଏବଂ ଔଷଧ ନପାଇ ଯେମିତି କୌଣସି ଜନସାଧାରଣ ମୃତ୍ୟୁବରଣ ନକରନ୍ତି ସେଥିପାଇଁ ପ୍ରଧାନମନ୍ତ୍ରୀ ସାରା ଦେଶରେ ୯ ହଜାରରୁ ଅଧିକ ଜନ ଔଷଧି କେନ୍ଦ୍ର ଖୋଲିଛନ୍ତି । ଏହି କେନ୍ଦ୍ରରେ ଶସ୍ତା ଓ ଗୁଣାତ୍ମକ ଔଷଧ ମିଳୁଛି । ଭୁବନେଶ୍ବର ସଂସଦୀୟ କ୍ଷେତ୍ରରେ ପ୍ରାୟ ୫୦ରୁ ଅଧିକ ଜନ ଔଷଧି କେନ୍ଦ୍ର ଖୋଲିବା ଦିଗରେ ପଦକ୍ଷେପ ନେଇଥିବାରୁ ମୁଁ ସାଂସଦଙ୍କୁ ଧନ୍ୟବାଦ ଜଣାଉଛି । ଏହି କେନ୍ଦ୍ର ଗୁଡ଼ିକରେ ଦୈନିକ ୪ ରୁ ୫ହଜାର ଲୋକ ଔଷଧ କିଣୁଛନ୍ତି । ଶସ୍ତାରେ ଔଷଧ ମିଳୁଥିବାରୁ ଗରିବ ଓ ମଧ୍ୟବିତ୍ତଙ୍କୁ ଲାଭ ମିଳୁଛି । ଜନ ଔଷଧି କେନ୍ଦ୍ରରୁ ଔଷଧ କିଣୁଥିବା ଲୋକଙ୍କ ସହିତ ମଧ୍ୟ ମୁଁ କଥା ହୋଇଛି ।"

ଅନ୍ୟପଟେ ସାଂସଦ ଅପରାଜିତା ଷଡ଼ଙ୍ଗୀ କହିଛନ୍ତି, "ସ୍ବାସ୍ଥ୍ୟ ଜଗତରେ ପ୍ରଧାନମନ୍ତ୍ରୀ ଜନ ଔଷଧି(Pradhan Mantri Bhartiya Janaushadhi Pariyojana) କେନ୍ଦ୍ର ଏକ ସାମାଜିକ କ୍ରାନ୍ତି ସୃଷ୍ଟି କରିଛି । ବର୍ତ୍ତମାନ ରାଜ୍ୟରେ ୩୯୩ କେନ୍ଦ୍ର ଖୋଲାଯାଇଛି। ଏହି କେନ୍ଦ୍ରରେ ବହୁତ କମ୍ ଦାମରେ ଔଷଧ ମିଳୁଛି । ବର୍ତ୍ତମାନ ଭୁବନେଶ୍ବରରେ ୪୪ କେନ୍ଦ୍ର ରହିଛି । ଆଗାମୀ ଦିନରେ ଆହୁରି କେନ୍ଦ୍ର ଖୋଲିବ । ଆସନ୍ତା ଫେବୃଆରୀ ମାସରେ ସମସ୍ତ ଜନ ଔଷଧି କେନ୍ଦ୍ର ପରିଚାଳକଙ୍କୁ ନେଇ ଏକ ବୈଠକ ବସିବ ।"

ଏହାସହ କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡ. ମନସୁଖ ମାଣ୍ଡଭୀୟ ରବିବାର ଭୁବନେଶ୍ବର ଏମ୍ସ ଗସ୍ତ କରି ରୋଗୀ ସେବାର ଅନୁଧ୍ୟାନ କରିଥିଲେ । କେନ୍ଦ୍ରମନ୍ତ୍ରୀ ଏମ୍ସର ବିଭିନ୍ନ ୱାର୍ଡକୁ ପରିଦର୍ଶନରେ ଯାଇ ରୋଗୀ ସେବାର ତଦାରଖ କରିଥିଲେ । ଏହାସହ ଓପିଡି ମଧ୍ୟ ବୁଲି ଦେଖିବା ସହ କର୍ମଚାରୀମାନଙ୍କ ସହ ମଧ୍ୟ ଆଲୋଚନା କରିଥିଲେ । ପ୍ରଧାନମନ୍ତ୍ରୀ ଟିବି ମୁକ୍ତ ଭାରତ ଅଭିଯାନ ଅଧୀନରେ ଟିବି ରୋଗୀଙ୍କୁ ପୁଷ୍ଟିକର ସହାୟତା ପ୍ୟାକେଟ୍ ପ୍ରଦାନ କରିଥିଲେ ।

ଇଟିଭି ଭାରତ, ଭୁବନେଶ୍ବର