ଖୋର୍ଦ୍ଧା: ଥରେ କି ଦୁଇ ଥର ନୁଁହେ ତିନି ତିନି ଥର ହୃଦାନନ୍ଦ ସ୍ବାଇଁଙ୍କ ଘରେ ବୋମା ମାଡ଼ କରିବା ଘଟଣାରେ ସୁପାରି କିଲରଙ୍କ ହାତ ଥିବା ନେଇ ଗଣମାଧ୍ୟମକୁ ସୂଚନା ଦେଇଛନ୍ତି ଖୋର୍ଦ୍ଧା ଏସପି । ସୂଚନା ଅନୁଯାୟୀ ହୃଦାନନ୍ଦ ଏବଂ ତାଙ୍କ ପଡୋଶୀଙ୍କ ମଧ୍ୟରେ ପାରିବାରିକ ବିବାଦ କାରଣରୁ ଏହି ବୋମାମାଡ଼ ହୋଇଥିବା ଜଣାପଡିଛି ।
ଏହି ଘଟଣାରେ ସଦର ଥାନା ପୋଲିସ ପୂର୍ବରୁ ଜଣକୁ ଗିରଫ କରିଥିବା ବେଳେ ଶୁକ୍ରବାର ଦୁଇ ଜଣ ଦୁର୍ବୃତ୍ତଙ୍କୁ ଗିରଫ କରାଯାଇଥିବା ନେଇ ଏସପି ସୂଚନା ଦେଇଛନ୍ତି । ସଦର ଥାନା ଅନ୍ତର୍ଗତ ଦଳେଇପୁଟ ଗ୍ରାମର ହୃଦାନନ୍ଦ ସ୍ବାଇଁଙ୍କ ଘର ଉପରକୁ ଗତ 11 ତାରିଖ ଏବଂ 18 ତାରିଖରେ ବୋମାମାଡ଼ ହୋଇଥିଲା । ଏହି ଘଟଣାରେ ହୃଦାନନ୍ଦଙ୍କ ପରିବାରର ସୁରକ୍ଷା ପାଇଁ ତାଙ୍କ ଘରେ ପୋଲିସ ମୁତୟନ କରାଯାଇଥିଲା । କିନ୍ତୁ ଗୁରୁବାର ବିଳମ୍ବିତ ରାତିରେ ପୁନର୍ବାର ଚାରି ଜଣ ଦୁର୍ବୃତ୍ତ ଆସି ଚାରୋଟି ବୋମାମାଡ଼ କରିଥିବା ଦେଖାଯାଇଥିଲା ।
ଖୋର୍ଦ୍ଧାରୁ ଗୋବିନ୍ଦ ଚନ୍ଦ୍ର ପଣ୍ଡା, ଇଟିଭି ଭାରତ