ଛାତ୍ର ସଂସଦ ନିର୍ବାଚନ ତାତି: ଉଚ୍ଚଶିକ୍ଷା ମନ୍ତ୍ରୀଙ୍କ ଘର ଆଗରେ ଗର୍ଜିଲେ ଛାତ୍ର

ଛାତ୍ର ସଂସଦ ନିର୍ବାଚନ ଦାବିରେ ଉଚ୍ଚଶିକ୍ଷା ମନ୍ତ୍ରୀଙ୍କ ଘର ଆଗରେ ଗର୍ଜିଲା ଅଲ୍ ଓଡିଶା ଷ୍ଟୁଡେଣ୍ଟ ଭଏସ ସଂଗଠନ । ଅଧିକ ପଢନ୍ତୁ

ଭୁବନେଶ୍ବର:ଥମୁନି ଛାତ୍ର ସଂସଦ ନିର୍ବାଚନ ତାତି । ନିର୍ବାଚନ କରିବା ଦାବିରେ ଉଚ୍ଚଶିକ୍ଷା ମନ୍ତ୍ରୀ ରୋହିତ ପୂଜାରୀଙ୍କ ଭୁବନେଶ୍ବର ସ୍ଥିତ ବାସଭବନ ଆଗରେ ଗର୍ଜିଲା ଅଲ୍ ଓଡିଶା ଷ୍ଟୁଡେଣ୍ଟ ଭଏସ ସଂଗଠନ(Voices grow for student union election) । ଆଜି ସଂଗଠନ ପକ୍ଷରୁ ଉଚ୍ଚଶିକ୍ଷା ମନ୍ତ୍ରୀଙ୍କ ବାସଭବନ ଘେରାଉ କରାଯାଇଛି । ଏହାସହିତ ମନ୍ତ୍ରୀଙ୍କୁ ଏକ ଦାବିପତ୍ର ଦିଆଯାଇଛି ।

ସଂଗଠନ ପକ୍ଷରୁ କୁହାଯାଇଛି ଯେ, ''କୋଭିଡ ଏବଂ ବିଭିନ୍ନ ଆଳ ଦେଖାଇ ରାଜ୍ୟ ସରକାର ଦୀର୍ଘ ୫ ବର୍ଷ ହେଲା ଛାତ୍ର ସଂସଦ ନିର୍ବାଚନ ବନ୍ଦ କରିଛନ୍ତି । ଏହା ଗଣତନ୍ତ୍ରର ହତ୍ୟା । ସରକାର ତୁରନ୍ତ ଏହି ବିଷୟ ଉପରେ ଧ୍ୟାନ ଦିଅନ୍ତୁ । ଛାତ୍ରମାନଙ୍କ ହକ୍ ଛଡେଇ ନେବାକୁ ରାଜ୍ୟ ସରକାର ଯେଉଁ ଅପଚେଷ୍ଟା ଜାରି ରଖିଛନ୍ତି, ତୁରନ୍ତ ଏହାକୁ ବନ୍ଦ କରି କଲେଜ ଗୁଡିକରେ ନିର୍ବାଚନ ଲାଗୁ କରନ୍ତୁ ।''

ବ୍ରହ୍ମପୁର, କଟକ ଭଳି ଅନେକ ଜିଲ୍ଲାର ପ୍ରମୁଖ କଲେଜ ଗୁଡିକରେ ଛାତ୍ର ବିଜେଡି ଆତଙ୍କ ସୃଷ୍ଟି କରୁଛି । ଯାହାଫଳରେ ସାଧାରଣ ଛାତ୍ରଛାତ୍ରୀ କଲେଜ ଯିବାକୁ ଭୟ କରୁଛନ୍ତି । ଏଥିପାଇଁ ତୁରନ୍ତ ଛାତ୍ର ସଂସଦ ନିର୍ବାଚନ କରନ୍ତୁ ନଚେତ ଆଗାମୀ ଦିନରେ ବଡ଼ ଆନ୍ଦୋଳନ ହେବ ବୋଲି ଚେତାବନୀ ଦେଇଛନ୍ତି ଦେଇଛି ଅଲ୍ ଓଡିଶା ଷ୍ଟୁଡେଣ୍ଟ ଭଏସ । ପୂର୍ବରୁ ମଧ୍ୟ ଛାତ୍ର ସଂସଦ ନିର୍ବାଚନ ନେଇ ଏହି ସଂଗଠନ ପକ୍ଷରୁ ଉଚ୍ଚଶିକ୍ଷା ମନ୍ତ୍ରୀଙ୍କ ଘର ଆଗରେ ବିକ୍ଷୋଭ ପ୍ରଦର୍ଶନ ହୋଇଥିଲା । ମନ୍ତ୍ରୀଙ୍କ ଉପରକୁ ଅଣ୍ଡାମାଡ କରିଥିଲେ ଉତ୍ୟକ୍ତ ଛାତ୍ର ।

ଇଟିଭି ଭାରତ, ଭୁବନେଶ୍ବର