ଖୋର୍ଦ୍ଧା: ମହିଳା ମାନଙ୍କୁ ସ୍ବାବଲମ୍ବୀ, ସୁରକ୍ଷା, ଶିକ୍ଷା, ସ୍ବାସ୍ଥ୍ୟ ଯୋଗାଇ ଦେଲେହିଁ ରାଷ୍ଟ୍ରର ବିକାଶ ହୋଇପାରିବ । ଖାଲି ସ୍ବୟଂ ସହାୟିକା ଗୋଷ୍ଠୀ ଗଠନ କରିଦେଲେ ମହିଳାଙ୍କ ବିକାଶ ହେବ ନାହିଁ । ମହିଳା ମାନଙ୍କୁ କର୍ମ ଓ ଉପାର୍ଜନକ୍ଷମ କରିବାକୁ ପଡିବ ବୋଲି ରବିବାର ବିଶ୍ବ ମହିଳା ଦିବସରେ ଏକ ବିଶାଳ ସମାବେଶରେ ଯୋଗଦେଇ କହିଛନ୍ତି ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀ ।
ଖୋର୍ଦ୍ଧା ଜିଲ୍ଲା ବେଗୁନିଆ ମିନି ଷ୍ଟାଡିୟମରେ ଠାରେ ସ୍ବେଛାସେବୀ ଅନୁଷ୍ଠାନ ‘ଅଜିତା’ ପକ୍ଷରୁ ମହିଳା ମହାସମାବେଶରେ ମୁଖ୍ୟ ଅତିଥି ରୂପେ ଯୋଗଦେଇ ବର୍ଷକୁ ଗୋଟିଏ ଦିନ ମହିଳାଙ୍କ ଦିନ ନୁହେଁ ବରଂ 365 ଦିନ ହେଉଛି ମହିଳାଙ୍କର ବୋଲି କହିଛନ୍ତି ସାଂସଦ । ପ୍ରତ୍ୟେକ ମହିଳା ନିଜର ଆତ୍ମବିଶ୍ବାସ ସହ ସ୍ବାଭିମାନ ସହ ବଞ୍ଚିବା ଆବଶ୍ୟକ ବୋଲି କହିଛନ୍ତି ଅପରାଜିତା । ଏହି ଅବସରରେ ମହିଳାଙ୍କୁ ସ୍ବାବଲମ୍ବୀ କରିବା ପାଇଁ ‘ଅଜିତା’ ଦ୍ବାରା ଭୁବନେଶ୍ବରର ଡୁମୁଡୁମା, ହଳଦୀ ପଡିଆ, ହଳଦିଆ, ଜଟଣୀ, ବାଲିପାଟଣା ଅଞ୍ଚଳରେ 20ଟି ଜୀବିକା ଉପାର୍ଜନ କେନ୍ଦ୍ର ସ୍ଥାପନ କରିଥିବା ସାଂସଦ କହିଛନ୍ତି ।