ଭୁବନେଶ୍ବର: ଜୀବନ ଥିଲେ ତ ସମସ୍ୟା ଅଛି । ଆଉ ସେହି ସମସ୍ୟାକୁ ପାର କରି ନିଜର କର୍ତ୍ତବ୍ୟ କରିବାର ଅଛି । ଭଗବାନଙ୍କ ଇଚ୍ଛା ବିରୋଧରେ ସିନା ଯାଇପାରିବାନି ହେଲେ ତାଙ୍କ ଇଚ୍ଛାକୁ ସମ୍ମାନ ଜଣାଇ ନିଜର ଦୃଢ ସାମର୍ଥ୍ୟ ମନୋବଳ ଲଗାଇ ଜୀବନ ଯୁଦ୍ଧରେ ସବୁ ବାଧା ଓ ବିଘ୍ନ କୁ ପାର କରିପାରିବା । କେବଳ ଶାରୀରିକ ସୁସ୍ଥତା ଜଣଙ୍କୁ ରୋଜଗାରକ୍ଷମ କରିପାରିବ ତାକୁ ଭୁଲ ବୋଲି ପ୍ରମାଣିତ କରିଛନ୍ତି BMCରେ ପାର୍କିଂ ଫି ଆଦାୟ କରୁଥିବା ଭୁବନେଶ୍ଵର ଅନ୍ତର୍ଗତ ଭରତପୁର ଅଞ୍ଚଳର ଦିବ୍ୟାଙ୍ଗ ସୁରତ ବେହେରା । ଗୋଟିଏ ହାତରେ ପାର୍କିଂ ଫି ଆଦାୟ କରି ନିଜ ପରିବାର ପୋଷଣ କରୁଛନ୍ତି। ପିଲାଟି ବେଳରୁ ବାପା ମାଆ ଚାଲିଯିବା ପରେ ଏବେ ଭୁବନେଶ୍ବରରେ ଅଜା ଓ ଆଇଙ୍କ ପାଖରେ ସାହା ଭରସା ହୋଇ ରହିଛନ୍ତି ସୁରତ ।
ସୁରତ ଜନ୍ମରୁ ଦିବ୍ୟାଙ୍ଗ ନଥିଲେ । 8 ବର୍ଷ ବୟସରେ ଦୋଳି ଖେଳିବା ସମୟରେ ସେ ପଡିଯାଇଥିଲେ । ଯାହାଦ୍ୱାରା ତାଙ୍କ ଡାହାଣ ହାତ ଭାଙ୍ଗି ଯାଇଥିଲା। ଏହାପରେ ହାତଟି ପ୍ଲାଷ୍ଟର ହୋଇଥିଲା। କିନ୍ତୁ ହାତଟି ସେଫ୍ଟିକ୍ ବା ସଂକ୍ରମଣ ହୋଇଯିବାରୁ ଡାକ୍ତରଙ୍କ ପରାମର୍ଶ ଅନୁଯାୟୀ ହାତଟି କାଟିବାକୁ ପଡ଼ିଥିଲା। 2006 ମସିହାର ଏହି ଘଟଣା । କିନ୍ତୁ ଏହି ଘଟଣା ତାଙ୍କୁ ଆଗକୁ ବଢିବାରେ କେବେ ଅଟକାଇ ପାରିନି । ଦୃଢ ମନୋବଳ ଫଳରେ ସେ ସଫଳତାର ଶୀର୍ଷରେ ପହଞ୍ଚି ପାରିଛନ୍ତି । ନିଜେ ରୋଜଗାରକ୍ଷମ ହୋଇ ନିଜ ପରିବାର ପୋଷୁଛନ୍ତି ।
ପରିବାର କହିଲେ ଅଜା ଏବଂ ଆଇ । 5 ବର୍ଷ ବୟସରୁ ବାପା ମା ଙ୍କୁ ହରାଇଛନ୍ତି । ପିଲାଟି ବେଳରୁ ମନରେ ଅନେକ ଆଶା ନେଇ ଭବିଷ୍ୟତ ଗଢ଼ିବାର ସ୍ୱପ୍ନ ଦେଖିଥିଲେ, ହେଲେ ବର୍ତ୍ତମାନ ପାର୍କିଂ ଫି କାଟୁଛନ୍ତି । ସୁରତ ଯୁକ୍ତ ତିନି ପାଠ ବି ପଢି ପ୍ରଥମ ଶ୍ରେଣୀରେ ଉତ୍ତୀର୍ଣ୍ଣ ହୋଇଛନ୍ତି । ଏଥିସହ ଆଗକୁ ପିଜି କରିବାକୁ ଇଚ୍ଛା ରଖିଛନ୍ତି । ଆଗକୁ ସରକାରୀ ଚାକିରି ପାଇଁ ମନ ବଳାଇଛନ୍ତି ସୁରତ।