ଭୁବନେଶ୍ବର: ବେଆଇନ ଲିଙ୍ଗ ନିରୂପଣ ସମ୍ପର୍କରେ ସୂଚନା ଦେଲେ ମିଳିବ 25 ହଜାର ଟଙ୍କାର ପୁରସ୍କାର । ତିନି କିସ୍ତିରେ ସୂଚନାଦାତାଙ୍କୁ 25 ହଜାର ଟଙ୍କା ନଗଦ ପୁରସ୍କାର ସହିତ ଉତ୍ସାହିତ କରାଯିବ । ଏହି ଯୋଜନାରେ ଲୋକଙ୍କ ସକ୍ରିୟ ଅଂଶଗ୍ରହଣ ନିଶ୍ଚିତ କରିବା ପାଇଁ ସମ୍ପ୍ରଦାୟ ମଧ୍ୟରେ ସଚେତନତା ସୃଷ୍ଟି କରିବାକୁ ଜିଲ୍ଲାପାଳମାନଙ୍କୁ କୁହାଯାଇଛି । ନିଶ୍ଚିତ ସୂଚନା ଦେବା ପରେ 10 ହଜାର ଟଙ୍କା ସହ ଅଭିଯୁକ୍ତଙ୍କ ବିରୁଦ୍ଧରେ ଅଭିଯୋଗ ଗଠନ ଏବଂ ପ୍ରବର୍ତ୍ତନ ରିପୋର୍ଟ ଦାଖଲ ପରେ ଦଶ ହଜାର ଟଙ୍କା ଏବଂ କୋର୍ଟରେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ପାଞ୍ଚ ହଜାର ଟଙ୍କା ଦେବେ ରାଜ୍ୟ ସରକାର ।
ଜିଲ୍ଲା ସ୍ତରରେ ଅଲଗା ଗୋପନୀୟ ଫାଇଲ ଏବଂ ଅଭିଯୋଗ ରେଜିଷ୍ଟର ରହିବ । ଅଭିଯୋଗ ଗ୍ରହଣ ପାଇଁ ଗୋଟିଏ ଯୋଗାଯୋଗ ନମ୍ବର ରଖାଯିବ । ଏନେଇ ଜଣେ ଅଧିକାରୀଙ୍କୁ ନିଯୁକ୍ତ କରାଯିବ । ସୂଚନା ଏବଂ ଅଭିଯୋଗ ପାଇବା ପରେ, ଉପଯୁକ୍ତ କର୍ତ୍ତୃପକ୍ଷ ଜିଲ୍ଲା ଟାସ୍କଫୋର୍ସ ସଦସ୍ୟଙ୍କ ସାହାଯ୍ୟରେ ପ୍ରକୃତ ତଥ୍ୟ ଅନୁସନ୍ଧାନ କରିବେ ।