ସିଇଓଙ୍କ ନିକଟରେ ବିଜେଡି ଫେରାଦ, ଜନଜାତି ଆୟୋଗ ସଭ୍ୟଙ୍କ କାର୍ଯ୍ୟକ୍ରମ ବାତିଲ ଦାବି ଭୁବନେଶ୍ବର: ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଆଜି ଫେରାଦ ହୋଇଛି ବିଜୁ ଜନତା ଦଳ । ଝାରସୁଗୁଡାରେ ଜାତୀୟ ଜନଜାତି କମିଶନ ସଦସ୍ୟଙ୍କ ସମ୍ଭାବ୍ୟ କାର୍ଯ୍ୟକ୍ରମ ବାତିଲ ଲାଗି ଅନୁରୋଧ କରିଛି ଦଳ । କାର୍ଯ୍ୟକ୍ରମ ହେବା ଦ୍ୱାରା ଆଦର୍ଶ ଆଚରଣ ବିଧି ଉଲଘଂନ ଆଶଙ୍କା କରିଛନ୍ତି ବିଜେଡି ନେତୃବୃନ୍ଦ ।
ଝାରସୁଗୁଡାରେ ଆଦର୍ଶ ଆଚରଣ ବିଧି ଉଲଂଘନ ହେବା ଆଶଙ୍କା କରିଛି ବିଜେଡି । ଏନେଇ ରାଜ୍ୟ ମୁଖ୍ୟ ନିର୍ବାଚନ ଅଧିକାରୀଙ୍କ ଦ୍ୱାରସ୍ଥ ହୋଇଛି ବିଜେଡି । ବିଜେଡି ଅଭିଯୋଗ କରିଛି ଯେ, ଜାତୀୟ ଜନଜାତି କମିଶନଙ୍କ ସଭ୍ୟ ଅନନ୍ତ ନାଏକ ଏକ କାର୍ଯ୍ୟକ୍ରମରେ ଯୋଗ ଦେବାକୁ ଝାରସୁଗୁଡା ଆସୁଥିବା ସୂଚନା ପାଇଛି ଦଳ । ଅନନ୍ତ ନାୟକ ଏକ କାର୍ଯ୍ୟକ୍ରମ ଓ ବୈଠକରେ ସାମିଲ ହେବା ନେଇ ସୂଚନା ରହିଛି । ଅନନ୍ତ ଅତୀତରେ ଜଣେ ବିଜେପି ନେତା ଥିଲେ । କେନ୍ଦୁଝର ଆସନରୁ ସଂସଦକୁ ମଧ୍ୟ ନିର୍ବାଚିତ ହୋଇଥିଲେ । ମାତ୍ର ଏବେ ସେ ଜାତୀୟ ଜନଜାତି ଆୟୋଗର ସଭ୍ୟ ଭଳି ଏକ ସମ୍ମାନଜନକ ସାମ୍ବିଧାନିକ ପଦରେ ଅଛନ୍ତି ।
ତେଣୁ ଏହି ସମୟରେ ଅନନ୍ତ ଝାରସୁଗୁଡ଼ାରେ କୌଣସି ବୈଠକରେ ଯୋଗ ଦେବାର ଯଥାର୍ଥତା ନାହିଁ । ଏପରି କଲେ ତାହା ଆଦର୍ଶ ଆଚରଣ ବିଧିର ଉଲଂଘନ ବୋଲି ଧରାଯିବ । ଉପନିର୍ବାଚନ ଶେଷ ହେବା ପରେ ଅନନ୍ତ ଝାରସୁଗୁଡ଼ା ଗସ୍ତ କରିପାରିବେ । ସେଠାରେ ଅନନ୍ତ ଯେକୌଣସି ସ୍ଥାନରେ ବୈଠକ କଲେ ବିଜେଡିର କୌଣସି ଆପତ୍ତି ରହିବ ନାହିଁ । ତେଣୁ ଅନନ୍ତଙ୍କୁ ଏବେ ଆଦର୍ଶ ନିର୍ବାଚନ ଆଚରଣ ବିଧି ଉଲଂଘନ କରି ଝାରସୁଗୁଡ଼ାରେ କୌଣସି ବୈଠକରେ ଯୋଗ ଦେବାର ଅନୁମତି ପ୍ରଦାନ ନ କରିବାକୁ ବିଜେଡି ନିବେଦନ କରିଛି ।
ମୁଖପାତ୍ର ଲେନିନ ମହାନ୍ତିଙ୍କ ନେତୃତ୍ୱରେ ସିଇଓଙ୍କ ଦ୍ୱାରସ୍ଥ ହୋଇଥିଲା ବିଜେଡିର 10 ଜଣିଆ ପ୍ରତିନିଧି ଦଳ । ଦଳରେ ରହିଛନ୍ତି ଲୋରା ମହାପତ୍ରା, ସ୍ୱାଗତିକା ମହାନ୍ତି, ମଧୁସ୍ମିତା ନାୟକ, ଅପୂର୍ବା ଅପରୂପା, ଅମିତ ମଲ୍ଲିକ, ସ୍ୱୟଂ ପ୍ରକାଶ ମହାପାତ୍ରା, ତମ୍ଭୁନାଥ ପଣ୍ଡା, ମିହିର ରାୟ ଓ ଡ଼. ପ୍ରିୟବ୍ରତ ମାଝୀ । ଆସନ୍ତା ମେ 10 ତାରିଖରେ ଝାରସୁଗୁଡ଼ା ବିଧାନସଭା ଆସନ ଲାଗି ଉପନିର୍ବାଚନ ଅନୁଷ୍ଠିତ ହେବ । ମେ ’ 13 ରେ ଝାରସୁଗୁଡା ଉପନିର୍ବାଚନର ଫଳାଫଳ ପ୍ରକାଶ ପାଇବ । ସଂପ୍ରତି ଝାରସୁଗୁଡ଼ାରେ ଆଦର୍ଶ ନିର୍ବାଚନ ଆରଚଣ ବିଧି ଲାଗୁ ହୋଇଛି ।
ଇଟିଭି ଭାରତ, ଭୁବନେଶ୍ବର
