ଭୁବନେଶ୍ବର: ଦିଲ୍ଲୀ ଗସ୍ତରେ ଅଛନ୍ତି ବିଜେପିର 22 ବିଧାୟକ । ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଏବଂ ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେ.ପି ନଡ୍ଡାଙ୍କୁ ଭେଟି ଆଲୋଚନା କରିବେ ବିଧାୟକ । ରାଜ୍ୟରେ ଭ୍ରଷ୍ଟ ଶାସନ ବିରୁଦ୍ଧରେ କେମିତି ନିର୍ବାଚନରେ ଲଢେଇ ହେବ ସେ ନେଇ ଗୁରୁମନ୍ତ୍ର ଆଣିବେ ବିଧାୟକ ଟିମ୍ । ଆଗାମୀ ନିର୍ବାଚନ ପାଇଁ ରାଷ୍ଟ୍ରୀୟ ନେତାଙ୍କ ଠାରୁ ପରାମର୍ଶ ନିଆଯିବ । 22 ତାରିଖ ଦିଲ୍ଲୀରେ ବିଜେପି ରାଷ୍ଟ୍ରୀୟ ପଦାଧିକାରୀ ବୈଠକ ବସିବ । ଏଥିରେ ରାଜ୍ୟ ବିଜେପି ନେତାମାନେ ମଧ୍ୟ ଯୋଗ ଦେବେ । 22 ତାରିଖ ଅପରାହ୍ନରୁ 23 ତାରିଖ ସନ୍ଧ୍ୟା ପର୍ଯ୍ୟନ୍ତ ବୈଠକ ଚାଲିବ । 23 ତାରିଖ ରାତିରେ ଅନ୍ୟ ବୈଠକ ମଧ୍ୟ ଅଛି ବୋଲି ସୂଚନା ଦେଇଛନ୍ତି ବିଜେପି ରାଜ୍ୟ ସଭାପତି ମନମୋହନ ସାମଲ ।
ତେବେ ମନମୋହନ କହିଛନ୍ତି, " ନିର୍ବାଚନରେ ପ୍ରାର୍ଥୀ ହେବ କିଏ ସର୍ଭେ ଚାଲିଛି । ଟିକେଟକୁ ନେଇ ସମସ୍ତ ବିଷୟ କେନ୍ଦ୍ର ନେତୃଙ୍କ ଅବଗତରେ ଅଛି । ଆମକୁ ଯାହା ପରାମର୍ଶ ଦରକାର ପଡ଼ିବ ଆମେ ନେବୁ । ଆମକୁ ଯାହା ମତାମତ ପଚରା ଯିବ ଆମେ ନେବୁ । ଏହାସହ ପାର୍ଲ୍ୟାମେଣ୍ଟାରୀ ପାର୍ଟି ନିଷ୍ପତ୍ତି ନେବ । ଯେତେବେଳେ ଯେଉଁ ରଣନୀତି କେନ୍ଦ୍ରୀୟ ନେତୃତ୍ବ କହିବେ ତାକୁ ରାଜ୍ୟରେ କାର୍ଯ୍ୟକାରୀ କରାଯିବ । ସବୁ ରାଜ୍ୟରେ ଷ୍ଟ୍ରାଟେଜି ଅଲଗା ଅଲଗା । ମଧ୍ୟପ୍ରଦେଶ, ଛତିଶଗଡରେ ଅଲଗା ଷ୍ଟ୍ରାଟେଜି ଥିଲା । ଓଡ଼ିଶାର କେଉଁ ଷ୍ଟ୍ରାଟେଜିରେ ନିର୍ବାଚନ ଲଢିବା ସେଇଟା ପାର୍ଲ୍ୟାମେଣ୍ଟାରୀ ପାର୍ଟି ନିଷ୍ପତ୍ତି ନେବ ।"