ଭୁବନେଶ୍ବର: ଆଜି ଠାରୁ ଆରମ୍ଭ ହୋଇଛି ରାଜ୍ୟ ବିଜେପି କାର୍ଯ୍ୟକାରିଣୀ ବୈଠକ । ବୈଠକରେ ସାମ୍ପ୍ରତିକ ରାଜନୈତିକ ପ୍ରସଙ୍ଗ ଆଲୋଚନା ହେବା ସହ ଆଗାମୀ ସାଧାରଣ ନିର୍ବାଚନ ପାଇଁ ରଣନୀତି ପ୍ରସ୍ତୁତ ହେବ । ବୈଠକରେ ରାଜ୍ୟର 3 କେନ୍ଦ୍ରମନ୍ତ୍ରୀ, କ୍ଷେତ୍ରୀୟ ପ୍ରଭାରୀ, ରାଜ୍ୟ ପ୍ରଭାରୀଙ୍କ ସମେତ ସମସ୍ତ କାର୍ଯ୍ୟକାରିଣୀ ସଦସ୍ୟ ସାମିଲ ହେବେ ।
ଆଜି ବୈଠକର ପ୍ରଥମ ଦିନରେ ବିଜେପି ରାଜ୍ୟ ପଦାଧିକାରୀ ଏବଂ ଜିଲ୍ଲା ସଭାପତି ମାନଙ୍କର ବୈଠକ ବସିବ । ଏହି ବୈଠକରେ ଯୋଗ ଦେବେ ବିଜେପି ପ୍ରଭାରୀ ଡି ପୁରନ୍ଦେଶ୍ୱରୀ ଏବଂ ସହ ପ୍ରଭାରୀ ବିଜୟ ପାଲ ସିଂ ତୋମାର। ରାଜ୍ୟ କାର୍ଯ୍ୟକାରିଣୀରେ କେଉଁ ସବୁ ପ୍ରସଙ୍ଗରେ ଆଲୋଚନା ହେବ, ତାହା ଆଜିର ବୈଠକରେ ନିର୍ଦ୍ଧାରିତ ହେବ ବୋଲି ସୂଚନା ଦେଇଛନ୍ତି ସାଧାରଣ ସମ୍ପାଦକ ପୃଥ୍ବୀରାଜ ହରିଚନ୍ଦନ । ପୃଥ୍ବୀରାଜ କହିଛନ୍ତି, ‘‘ରାଜ୍ୟ ସରକାରଙ୍କ ଅପାରଗ ପଣିଆକୁ ନେଇ ବ୍ୟାପକ ଆନ୍ଦୋଳନର ପ୍ରସ୍ତୁତି ରାଜ୍ୟ କାର୍ଯ୍ୟକାରିଣୀରେ ମୁଖ୍ୟ ଫୋକସ ରହିବ । ରାଜ୍ୟ ସରକାର ଲୋକଙ୍କୁ ଠକିବା ଆରମ୍ଭ କରିଛନ୍ତି । ଚାଷୀଙ୍କୁ ଠକିଛନ୍ତି ଆଜି ପର୍ଯ୍ୟନ୍ତ ମଣ୍ଡି ଅବ୍ୟବସ୍ଥା ଠିକ ହେଲା ନାହିଁ। ଆଜି ପର୍ଯ୍ୟନ୍ତ ଚାଷୀ ମଣ୍ଡିରେ ଧାନ ଦେଇ ପାରୁନାହିଁ। ଧାନର କଟନୀ ଛଟନୀ ଆହୁରି ବଢ଼ି ଯାଇଛି । 10 କେଜି ପର୍ଯ୍ୟନ୍ତ କଟନୀ ଛଟନୀ ହେଉଛି । ସେହିପରି ମଣ୍ଡିରେ ଧାନ କିଣାକୁ ମିଲର ମାନଙ୍କ ହାତରେ ବିକ୍ରି କରିଦେଇଛନ୍ତି ରାଜ୍ୟ ସରକାର । ଏ ପ୍ରକ୍ରିୟା ବିରୋଧରେ ଆନ୍ଦୋଳନ ଚଳାଇବ ବିଜେପି । ପ୍ରଧାନମନ୍ତ୍ରୀ ଆବାସ ଯୋଜନାରେ ଯୋଗ୍ୟ ହିତାଧିକାରୀଙ୍କୁ ଘର ଦିଆଯାଉ ଏବଂ ଅଯୋଗ୍ୟ ନପାଆନ୍ତୁ ଏ କଥାକୁ ନେଇ 3 ବର୍ଷ ଧରି ବିଜେପି ଲଢେଇ ଜାରି ରଖିଛି ।’’