ଭୁବନେଶ୍ବର:ରାଜ୍ୟରେ ସୁଦୃଢ଼ ହେବ ପରିବହନ ବ୍ୟବସ୍ଥା । ବ୍ୟବସ୍ଥାକୁ ସୁଦୃଢ଼ କରିବା ଉଦ୍ଦେଶ୍ୟରେ ବାଣିଜ୍ୟ ଓ ପରିବହନ ବିଭାଗର ପଦକ୍ଷେପ । ରାଜ୍ୟରେ ବ୍ଲକସ୍ତରୀୟ ବସଷ୍ଟାଣ୍ଡ ର୍ନିମାଣ ଓ ରକ୍ଷଣାବେକ୍ଷଣ ପାଇଁ ଏକ ନୂଆ ଯୋଜନା ଆଣିଛି ପରିବହନ ବିଭାଗ । ଯାହାକୁ ନେଇ ବିଭାଗ ପକ୍ଷରୁ ଏକ ବିଜ୍ଞପ୍ତି ଜାରି ହୋଇଛି ।
ତେବେ ବିଜ୍ଞପ୍ତି ଅନୁଯାୟୀ, ବସଷ୍ଟାଣ୍ଡ ର୍ନିମାଣ, ନବୀକରଣ ଓ ରକ୍ଷଣାବେକ୍ଷଣ ନାମରେ ଏହି ଯୋଜନା ରଖାଯାଇଛି । ଯୋଜନା ଅଧୀନରେ ୨୩ ଜିଲ୍ଲାରେ ୫୫ଟି ଅତ୍ୟାଧୁନିକ ବସଷ୍ଟାଣ୍ଡ ର୍ନିମାଣ ପାଇଁ ପ୍ରସ୍ତାବ ରହିଛି । ସେଥିମଧ୍ୟରୁ ୨୩ଟି ନୂଆ ବସଷ୍ଟାଣ୍ଡର ନିର୍ମାଣ କାର୍ଯ୍ୟ ଶେଷ ହୋଇଥିବା ବେଳେ ଏହାର ମୁଖ୍ୟମନ୍ତ୍ରୀ ଉଦଘାଟନ କରିଛନ୍ତି । ସେହିପରି ଅବଶିଷ୍ଟ ବସଷ୍ଟାଣ୍ଡର ନିର୍ମାଣ କାର୍ଯ୍ୟ ଶେଷ ପର୍ଯ୍ୟାୟରେ ରହିଛି । ଏହା ବ୍ୟତୀତ ଏହି ଭିତ୍ତିଭୂମିର ରକ୍ଷଣାବେକ୍ଷଣ ଏବଂ ଜନସାଧାରଣଙ୍କ ସୁବିଧାରେ ଉନ୍ନତି ଆଣିବା ପାଇଁ ଜିଲ୍ଲା ପ୍ରଶାସନ ଉପଯୁକ୍ତ ଏବଂ ବୃତ୍ତିଗତ ସୁବିଧା ପରିଚାଳନା ସେବା ସଂଗଠନ ଏବଂ ମିଶନ ଶକ୍ତି ସ୍ୱୟଂ ସହାୟକ ଗୋଷ୍ଠୀଙ୍କୁ ନିୟୋଜିତ କରିବ । ଯାହା ଯାତ୍ରୀଙ୍କ ସୁରକ୍ଷା ଏବଂ ଆରାମ ସୁନିଶ୍ଚିତ କରିବ । ଏହା ବ୍ୟତୀତ ବଲାଙ୍ଗୀର, ଜୟପୁର, ଆଠଗଡ଼ ଓ ମୋଟୁରେ ରାଜ୍ୟ ସରକାରଙ୍କ ପକ୍ଷରୁ ପୂର୍ବରୁ ର୍ନିମିତ ନୂଆ ବସଷ୍ଟାଣ୍ଡର ରକ୍ଷଣାବେକ୍ଷଣ ମଧ୍ୟ ଏହି ଯୋଜନାରେ କରାଯିବ ।
ସେହିପରି ମୋଟ ପ୍ରକଳ୍ପ ଖର୍ଚ୍ଚ ପ୍ରାୟ ୩୭୩.୧୩ କୋଟି ଟଙ୍କା ହେବ ବୋଲି ଆକଳନ କରାଯାଇଛି । ସେଥିମଧ୍ୟରୁ ପୁଞ୍ଜି ବ୍ୟୟ ଅଟକଳ ୩୦୪.୦୮ କୋଟି ଟଙ୍କା ରହିଛି । ଅବଶିଷ୍ଟ ୬୯ କୋଟି ଟଙ୍କା ବିକଳ୍ପ ଖର୍ଚ୍ଚ ଭାବେ ଧାର୍ଯ୍ୟ କରାଯାଇଛି । ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ, ପଞ୍ଚାୟତିରାଜ ଓ ପାନୀୟ ଜଳ ବିଭାଗ, ଗୃହ ର୍ନିମାଣ ଓ ନଗର ଉନ୍ନୟନ ବିଭାଗ, ପୂର୍ତ୍ତ ବିଭାଗ, ଅର୍ଥ ବିଭାଗ ଏବଂ ଓଡ଼ିଶା ରାଜ୍ୟ ପୋଲିସ ଗୃହ ର୍ନିମାଣ ଓ କଲ୍ୟାଣ ନିଗମ ଲିମିଟେଡର ପରାମର୍ଶକ୍ରମେ ବିସ୍ତୃତ ପ୍ରକଳ୍ପ ରିପୋର୍ଟ ପ୍ରସ୍ତୁତ କରାଯାଇଛି । ଏଥିସହ ସଂପୃକ୍ତ ଜିଲ୍ଲା ପ୍ରଶାସନର ସୁପାରିସ କ୍ରମେ ବ୍ଲକସ୍ତରୀୟ ବସଷ୍ଟାଣ୍ଡ ର୍ନିମାଣ ପାଇଁ ଉପଯୁକ୍ତ ଜମି ଚିହ୍ନଟ ଚୂଡ଼ାନ୍ତ ହୋଇଛି । ଜିଲ୍ଲା ପ୍ରଶାସନ ପକ୍ଷରୁ ପଞ୍ଚାୟତିରାଜ ପ୍ରତିଷ୍ଠାନ ଓ ଉପଜିଲ୍ଲା ସ୍ତରରେ ବ୍ଲକ କର୍ମକର୍ତ୍ତାଙ୍କୁ ସାମିଲ କରାଯାଇଛି ।