ଖୋର୍ଦ୍ଧା: ଇଚ୍ଛାଶକ୍ତି ଆଗରେ ହାର ମାନିଛି ଅକ୍ଷମତା । ଦିନ ଥିଲା ଗୋଟିଏ ଟ୍ରେନରୁ ଅନ୍ୟ ଏକ ଟ୍ରେନ ଘୁଷୁରି ଘୁଷୁରି ଭିକ୍ଷାବୃତ୍ତି କରୁଥିବା ଅଧିନ ଏବେ ହୋଇପାରିଛନ୍ତି ସ୍ୱାବଲମ୍ବୀ । ଆଉ ସମାଜରେ ଥିବା ଦିବ୍ୟାଙ୍ଗଙ୍କ ପାଇଁ ସୃଷ୍ଟି କରିଛନ୍ତି ଉଦାହରଣ । ଖୋର୍ଦ୍ଧା ଉପକଣ୍ଠ ମୁକ୍ତାପୁର ଗ୍ରାମର ଦିବ୍ୟାଙ୍ଗ ଅଧିନ ଓଝା । ବୟସ ପଚାଶ ଛୁଇଁଲାଣି । ତଥାପି ତାଙ୍କ ଆଗରେ ଯେମିତି ହାର ମାନିଛି ଅକ୍ଷମତା । ଅନ୍ୟ ଉପରେ ନିର୍ଭର ନକରି ନିଜେ ରୋଜଗାରକ୍ଷମ ହେବା ସହ ପାନ ଦୋକାନ କରି ପରିବାର 10 ପ୍ରାଣୀଙ୍କୁ ପୋଷୁଛନ୍ତି ସେ ।
ପ୍ରଥମେ କରୁଥିବା ଭିକ୍ଷାବୃତ୍ତି ତାଙ୍କୁ ବଡ ହେବା ପରେ ଭଲ ନଲାଗିବାରୁ ଧାର କରଜ କରି ନିଜ ଗାଁ ବଜାରରେ ଘର ଭଡାନେଇ ଗୋଟିଏ ଛୋଟ ପାନଦୋକାନ ଖୋଲିଥିଲେ । ପିଲାବେଳୁ ପୋଲିଓ ରୋଗରେ ଆକ୍ରାନ୍ତ ହୋଇ ଚାଲିବାକୁ ଅକ୍ଷମ । କିନ୍ତୁ ତାଙ୍କ ଇଚ୍ଛାଶକ୍ତି ଆଗରେ ସତେ ଯେମିତି ହାର ମାନିଛି ଅକ୍ଷମତା । ଅଧିନ 75 ପ୍ରତିଶତ ଭିନ୍ନକ୍ଷମ ବୋଲି ସ୍ୱାସ୍ଥ୍ୟ ବିଭାଗ ପ୍ରମାଣପତ୍ର ମଧ୍ୟ ଦେଇଛନ୍ତି । ଏହାସହ ସେ ଭତ୍ତା ଓ ସରକାର ଦେଉଥିବା ରାସନ ସାମଗ୍ରୀ ମଧ୍ୟ ପାଉଛନ୍ତି । ହେଲେ ସରକାରଙ୍କ ତରଫରୁ ଟ୍ରାଇ ସାଇକେଲ କି ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ଖଣ୍ଡିଏ ଦେଇନାହାନ୍ତି ସରକାର ।