ଚତୁର୍ଥ ଶ୍ରେଣୀ ଛାତ୍ରୀଙ୍କୁ ଚେଙ୍କ ଦେଲେ ଦିଦି, ଅସହ୍ୟ ଯନ୍ତ୍ରଣାରେ କୁନିଝିଅ

ଖୋର୍ଦ୍ଧାରେ ଜଣେ ଚତୁର୍ଥ ଶ୍ରେଣୀ ଛାତ୍ରୀଙ୍କୁ ଚେଙ୍କ ଦେଲେ ଶିକ୍ଷୟିତ୍ରୀ । ବୋଲଗଡ଼ ଅଞ୍ଚଳରେ ଏଭଳି ଘଟଣା ଦେଖିବାକୁ ମିଳିଛି । ଅଧିକ ପଢନ୍ତୁ

ଖୋର୍ଦ୍ଧା:ଦିଦିଙ୍କ ଅମାନବୀୟ କାଣ୍ଡ । ବିରୁଡି କାମୁଡିଲା ବୋଲି ଚତୁର୍ଥ ଶ୍ରେଣୀ ଛାତ୍ରୀଙ୍କୁ ଛୁରୀ ତତାଇ ଚେଙ୍କ ଦେଲେ ଦିଦି । ଆଉ ଅବସ୍ଥା ଏବେ ପୁରା ସଙ୍ଗୀନ । ଏମିତି ଏକ ଘଟଣା ଜିଲ୍ଲାର ବୋଲଗଡ ବ୍ଲକ ଅସରଳା ପଞ୍ଚାୟତର ଅସରଳା ନୋଡାଲ ଉଚ୍ଚ ପ୍ରାଥମିକ ବିଦ୍ୟାଳୟରେ ଦେଖିବାକୁ ମିଳିଛି । ତେବେ ଶିକ୍ଷୟିତ୍ରୀ ଜଣକ କୌଣସି ଉଦ୍ଦେଶ୍ୟ ରଖି ଏପରି କରିନଥିବା ଆଜି ଗଣମାଧ୍ୟମ ସମ୍ମୁଖରେ ପ୍ରତିକ୍ରିୟା ରଖି କହିଛନ୍ତି ।

ସୂଚନା ଅନୁଯାୟୀ ଗତକାଲି ଚତୁର୍ଥ ଶ୍ରେଣୀର ଛାତ୍ରୀ ସାଇନା ବିଶ୍ବାଳ ବିଦ୍ୟାଳୟରେ ସାଙ୍ଗ ପିଲାଙ୍କ ସହ ଖେଳୁଥିବା ବେଳେ ହଠାତ ଏକ ବିରୁଡି ତା କାନ୍ଧକୁ କାମୁଡି ଦେଇଥିଲା । ଯାହା ଫଳରେ ପ୍ରବଳ ବିନ୍ଧା ହୋଇଥିଲା । ସେ ଶିକ୍ଷୟିତ୍ରୀ ଜଣଙ୍କୁ କହିବାରୁ ଦିଦି ତାଙ୍କୁ ମେଡିକାଲ ନେବା ପରିବର୍ତ୍ତେ ଗ୍ୟାସ ଚୁଲାରେ ଏକ ଛୁରୀକୁ ତତାଇ ସାଇନା ବେକରେ ଚେଙ୍କ ଦେଇଥିଲେ । ଆଉ ଚେଙ୍କ ଦେବା ପରେ ତାହା ଅତ୍ୟଧିକ ପୋଡାଜଳା ହେବା ସହ ଫୋଟକା ହୋଇଯାଉଥିଲା । ଯନ୍ତ୍ରଣା ଅସହ୍ୟ ହେବାରୁ ଅଭିଭାବକଙ୍କୁ ନଜଣା ଅପରାହ୍ନରେ ମେଡିକାଲକୁ ନେଇ ଚିକିତ୍ସା କରାଇ ଘରକୁ ଛାଡି ଦେଇଥିଲେ ।

ଏମିତି କି ଛାତ୍ରୀ ଜଣକ ଯନ୍ତ୍ରଣାରେ ଛଟପଟ ହେଉଥିଲେ ମଧ୍ୟ ଘରକୁ ଛାଡ଼ି ବାକୁ କେହି ଶିକ୍ଷକ ଶିକ୍ଷୟିତ୍ରୀ ନଆସି ବା ସହ ଅବିଭାବକଙ୍କୁ ମଧ୍ୟ ଜଣାଇ ନଥିଲେ । ସେହିପରି ଘଟଣା ସମ୍ପର୍କରେ ପିତାମାତାଙ୍କୁ ଛାତ୍ରୀ ଜଣଙ୍କ ଜଣାଇବା ସହ ରାତ୍ରୀରେ ଭିଷଣ ଯନ୍ତ୍ରଣା ଅନୁଭବ କରିବା କଥା ଆଜି ବାପା କହିଛନ୍ତି । ସରକାରୀ ବିଦ୍ୟାଳୟରେ ଜଣେ ଶିକ୍ଷୟତ୍ରୀଙ୍କ ଏଭଳି ଅମାନବୀୟ ଆଚରଣକୁ ସ୍ଥାନୀୟ ଅଞ୍ଚଳରେ ନିନ୍ଦା କରିବା ସହିତ ସମ୍ପୃକ୍ତ ଶିକ୍ଷୟତ୍ରୀ ବିରୁଦ୍ଧରେ ଦୁଢ କାର୍ଯାନୁଷ୍ଠାନ ପାଇଁ ଦାବି କରିଛନ୍ତି ଅଭିଭାବକ । ସେପଟେ ଘଟଣା ସମ୍ପର୍କ ସ୍କୁଲ ପ୍ରଧାନ ଶିକ୍ଷକ କହିଛନ୍ତି ଏଭଳି ଘଟଣା ଘଟିବା ଦୁଃଖଦୟକ । ସେହିପରି ଚେଙ୍କ ଦେଇଥିବା ସମ୍ପୃକ୍ତ ଶିକ୍ଷୟତ୍ରୀ କହିଛନ୍ତି ମୁଁ କୌଣସି ଉଦ୍ଦେଶ୍ୟ ରଖି ଏପରି କରିନାହିଁ ।

କିଛି ଦିନ ତଳେ ଜଗତସିଂହପୁର ଉଗ୍ରତାରା କଲୋନୀରେ ବୋହୂକୁ ଗରମ ତାୱାରେ ଚେଙ୍କ ଦେବା ଘଟଣା ସାମ୍ନାକୁ ଆସିଥିଲା । ଏଥିରେ ଅଧ୍ୟାପିକା ଶାଶୁଙ୍କୁ ବାନ୍ଧିଥିଲା ପୋଲିସ । ଢେଙ୍କାନାଳ ଜିଲ୍ଲା ଭୁବନ ଥାନା ଅନ୍ତର୍ଗତ ତଲାବିଲ ଅଞ୍ଚଳର ରଶ୍ମିତା ବେହେରା ୨୦୨୨ ମସିହାରେ ଜଗତସିଂହପୁରର ସୁପ୍ରଭା ଜେନାଙ୍କ ପୁଅ ଖାରବେଳ ଦିଗବିଜୟ ପାତ୍ରଙ୍କୁ ବୈଦିକ ରୀତିରେ ବିବାହ କରିଥିଲେ । ବିବାହ ସମୟରେ କନ୍ୟାପକ୍ଷଙ୍କ ପକ୍ଷରୁ ବିଭିନ୍ନ ଯୌତୁକ ସାମଗ୍ରୀ ଦିଆଯାଇଥିଲା । ସବୁ କିଛି ସ୍ବାଭାବିକ ଥିବାବେଳେ ହଠାତ ରଶ୍ମିତାଙ୍କୁ ସ୍ୱାମୀ ଦିଗ ବିଜୟ ପାତ୍ର ଶାରିରୀକ ଓ ମାନସିକ ନିର୍ଯାତନା ଦେଉଥିବା ଅଭିଯୋଗ ହୋଇଥିଲା । ଏଥିରେ ଅଧ୍ୟାପିକା ଶାଶୁଙ୍କୁ ସମ୍ପୃକ୍ତି ଥିବା ଜଣାପଡ଼ିଥିଲା । ନିର୍ଯାତନା ପାଇଥିବା ମହିଳାଙ୍କ ଅଭିଯୋଗ ପରେ ଅଧ୍ୟାପିକା ଜଣଙ୍କୁ ଗିରଫ କରାଯାଇଥିଲା ।

ଇଟିଭି ଭାରତ, ଖୋର୍ଦ୍ଧା